WILLEMSTAD, - Parlamento ulandes mester siña hasi su hùiswèrk mihó. Kore saka konklushon sin buska drechi tampoko ta digno di un parlamentario pa hasi, asina minister di Finansa drs. Ersilia de Lannooy a reakshoná riba e posishon ku vários parlamentario ulandes a asumí riba maneho fiskal na Antia.
Tal manera nos a informá kaba na kuminsamentu di e siman aki, e maneho di kobra belasting na Antia tabata tópiko di diskushon den Parlamento ulandes. Partikularmente partido sosialista di Ulanda a kuestioná i kritiká e asuntu aki severamente.
Si tur hende kumpli ku nan obligashon pa paga belasting konforme lei, anto Antia lo weta kon el a solushoná tur su problemanan finansiero, Ronald van Raak di Socialistische Partij (SP) den Parlamento ulandes a bisa na e okashon ei.
Loke ta iritando e parlamentarionan mas i mas ta e hecho ku Ulanda a komprometé su mes pa eliminá e debe nashonal di Antia te na e montante di 2 mil mion euro, ku ta alrededor di 5 mil mion florin antiano.
Hopi parlamentario tin problema ku e hecho ku ta e pagadó di belasting ulandes mester bai skupi e plaka aki.
El a bisa ku el a komprondé ku tin hopi hende pero tambe hopi kompania ku no ta kumpliendo ku nan deber di kontribuí ku kaha di Gobièrnu, pagando belasting manera mester ta.
Paul Comenencia, minister plenipotensiario di Antia na Ulanda, tabata presente durante e debate aki, pa duna informashon, manera e mes a bisa, riba e situashon fiskal di Antia i el a desmentí den forma kategóriko ku por konsiderá Antia komo un paraiso fiskal, manera kada be ta bin dilanti den mundu polítiko ulandes.
Comenencia a sigurá Parlamento ulandes ku e parti mas grandi, sigur un 80 porshentu di poblashon di Antia ta kumpli kabalmente ku pago di belasting, manera mester ta.
Ronald van Raak no a keda kontentu ku e ponensia aki.
Van Raak a bisa ku e no por kaba di komprondé ku un kompania manera Valero ta operá na Statia, sin ku habitantenan di e isla tin algu di benefisio di esaki.
“Mi ta haña ku mester kobra Valero òf kualke kompania multinashonal grandi maske ta un mínimo na belasting. No por t’asina ku bo ta establesé un kaminda, bo ta probechá pa gana plaka pero bo no ta kontribuí ku nada”, Van Raak a bisa.
E dirigente di SP a anunsiá ku e lo bai hasi pregunta den Tweede Kamer riba e asuntu aki i ku e no ta bai laga e asuntu aki muri.
Minister Ersilia de Lannooy, kende ta na Ulanda e dianan aki pa un konferensia di Fondo Monetario Internashonal, a lamentá e aktitut di Parlamento ulandes.
Mi ta lamentá ku sin buska e informashon na drechi, nan ta kore kalifiká Antia komo un pais ku no tin regla den kobramentu di belasting, el a bisa.
De Lannooy tambe a enfatisá ku debidamente ta kumpliendo na Antia ku pagamentu di belasting.
Puntrá si e no ta kere ku tin kompania òf persona ku por paga mas tantu belasting, el a bisa ku no ta esei ta al kaso aworakí.
“Mi tambe por bisa ku na Ulanda nan por paga mas tantu belasting.
Pero bo tin ku tene kuenta ku e posishon kompetitivo di nos pais. E mesun kos ta konta pa e kompania Valero na Statia. Nan ta pagando belasting, pero aki tambe mester tene kuenta ku e posishon kompetitivo di e isla aki”, minister De Lannooy a bisa.
Manera ta konosí, sekretario di estado enkargá ku Relashon den Reino Ank Bijleveld a bisa ku e ta konsiderá ku maneho fiskal na Antia ta un asuntu outónomo di Antia. Gobièrnu ulandes no ta mete ku esei, el a bisa ku énfasis.