WILLEMSTAD, - Un total di 75 persona a inskribí pa e simposio ku ta tuma lugá dia 12 di yüni awor, un simposio ku e meta pa sinkronisá pensamentu i akshon riba tereno di maneho di adikshon.
Esei ta loke sekretario di estado enkargá ku salú públiko Joan Smart-Berkel a anunsiá ayera.
Gobièrnu Sentral ke yega na un solo maneho di adikshon aki na Antia. Aworakí esei ta diferente riba kada isla di Antia. Ku e meta aki, Gobièrnu ta organisá e konferensha pa asina pone tur nanishi den mesun direkshon, segun Smart-Berkel.
E problema di adikshon ta un kos serio den nos pais, asina e mandatario a mustra den deklarashonnan formulá algun siman pasá. Aworakí tin komo 150 adikto na droga ku mester haña tratamentu.
Brasami, e sentro ofisial di Gobièrnu, ku ta dediká su mes na tratamentu di esnan ku ta adikto na droga, no por akapará e personanan aki. Manera ta ampliamente konosí, no tin espasio – ni tampoko e medionan finansiero – disponibel pa por atendé ku nan tur.
E sentro Brasami aki na Kòrsou a enfrentá problema finansiero durante un periodo prolongá algun tempu pasá. Joan Smart-Berkel a bisa ku el a logra establesé un departamentu pa hende muhé den Brasami pa atendé ku drogadikto. Pero mi no ke sigui ekspandé esei sin mas, pero ke hink’é den kuadro di un pida maneho, el a bisa. E mandatario di tur manera ke atendé e tipo di kosnan aki den un pakete.
Mi a nota ku riba kada isla sinembargo, ta hasiendo esfuerso pa yuda e hendenan aki. Pero kada isla tin su mes manera di mira i hasi kos i te ainda no tin un uniformidat den esaki, Joan Smart-Berkel a indiká.
El a mustra ku Gobièrnu ke yega na un maneho ku ta mas uniforme posibel.
“Anto den e kuadro ei mi ke atendé ku maneho di adikshon. Ta den e kuadro ei mi ke atendé ku e situashon finansiero, ku e tipo di tratamentu ku e drogadikto mester haña, ku tur aspekto di maneho di adikshon”, el a bisa.
P’esei lo tin dia 12 di yüni awor un konferensia den kua Gobièrnu Sentral ke pone tur nanishi den mesun direkshon. Nos mester diskutí e asuntu aki konhuntamente pa weta kon por yega na un punto di salida komun pa atendé ku e problema aki, segun e mandatario a splika.
Durante e konferensia lo tin un eksperto for di República Dominicana pa duna su aporte. Ta konosí ku den e pais aki tin un sistema interesante kon atendé ku adikshon. Ta konosí ku nos a manda hende tambe pa e pais aki pa haña tratamentu.
Joan Smart Berkel a bisa finalmente ku no mester lubidá ku ora ta papia di adikshon, no ta papiando solamente di adikshon na droga. E por ta alkohòl, wega di plaka i asina tin mas tantu tipo di adikshon, el a añadí finalmente.