ORANJESTAD- RCA a sorprende y Britannia a defrauda, asina por conclui e prome wega di e final di division di Honor, cu a inicia diasabra anochi.
RCA cu dos gol di e hoben Jean Luc Bergen ta bin supera Britannia cu anotacion di 2-1 y asina pica dilanti den e serie final aki.
Un wega cu tabata bastante fuerte fisicamente y cu a conduci na dos expulsion, uno di parti di Britannia cu a mira Juwana keda expulsa mientras cu Maurice Escalona tambe a bandona e partido cu dos carchi geel.
RCA a pica dilanti pa medio di Bergen den e parti inicial di e partido pero cu gol di Juwana Britannia ta empata e partido na 1-1 y den di dos parti tabata Bergen kende un biaha mas ta anota pa duna RCA e triunfo importante aki.
Britannia no a hunga e futbol cu a spera di dje, caminda e ekipo a mustra lento riba tereno, cu poco variedad y poco creatividad.
RCA a domina e medio campo y no a permiti Britannia crece den e sector aki y eynan e exito grandi a sinta pa e ekipo tricolor.
Un publico grandi a presencia e prome wega di e final aki y diabierna venidero lo tin e di dos partido caminda RCA tin mester di solamente un empate pa corona su mes como campeon di futbol di division di Honor.