WILLEMSTAD – Breakpoint Pool Café na Granbeeuw tabata esenario di otro Tour Bola 8, e di dos edishon di Federashon di Biyar Kòrsou, ku a konta ku partisipashon di 52 hungadó den e evento aki di e total di 14 aktividat individual pa aña 2008.
Den e Tour 1 tabata e kargadó di e título di Kampion di Kòrsou den e disiplina ariba menshoná, Raymond Magdalena, ku a bai ku e título den e promé evento.
For di djaweps 29 di mei te ku djaluna último e torneo, pa hopi tabata un viktoria i pa otro un desepshon. Kuater hungadó a dominá den e buèlta ganador.
Den e parti ariba di e skema Johnny Hellmund i Anthony Wever tabata na kabes i den e parti abou Rafael Flores i Salim Kuzi.
Den e pelea pa e stul kayente Hellmund ta gana di Wever 6-4 i Flores tambe ta gana di Kuzi ku igual skor.
Hellmund i Flores ta enfrentá otro i finalmente e promé ta bai okupá e stul kayente ganadó 7-2.
Raymond Magdalena den su di dos partido ta keda mandá buèlta di pèrdèdó pa David Prins ku skor di 6-4.
Na e momentu aki ta inisiá e ruta largu ku opstákulo ku ta hiba Magdalena na su último partido.
Dos biaha e mester a duna su mihó wega pa superá tantu Jeffrey Nieuwenhuyzen i Salim Kuzi ganando nan 5-4.
Ku shete viktioria tras di otro esaki ta hib’é final.
Empatá na puesto number 5 ta keda Anthony Wever i Salim Kuzi. David Prins ta keda na e di kuater lugá i Rafael Flores ku tabatin un bon aktuashon den e torneo ta keda na e di tres lugá.
Raymond ku na vários okashon a demostrá ku Bola 8 ta su disiplina preferí, a duna bon nivel di wega kontra Hellmund, ku ta konosí di ta un di e hungadónan mas peligroso di Kòrsou.
Pero esaki no a intimidá Magdalena i ku su amplio Bola 8 ta empatá e partido na 5-5 i di e momentu ei ta dominá e partido final i ta konkistá pa di dos biaha e título di Bola 8.
E skor final 8-6 na fabor di Raymond Magdalena i Johnny Hellmund ta keda na di dos lugá.
Ainda falta tres evento mas di Tour Bola 8 i mester bai buta hopi atenshon pa “Mac” Magdalena ku ta den su “prime” na e momentunan aki.
Federashon Biyar di Kòrsou ta felisitá Raymond Magdalena i alabes ta rekòrdá tur su miembronan riba e gran rèli pa ekipo otro siman djasabra 14 di yüni na Breakpoint Pool Café.