CARACAS, Venezuela, - E Presidente venezolano, Hugo Chávez, ayera a pidi e lider nobo di “Fuerzas Armadas Revolucionarias de Colombia” (FARC), Alfonso Cano, pa libra di manera unilateral tur rehen di e grupo den selva komo promé paso pa logra pas n’e pais aki.
E mandatario, kende a risibí señalamentunan ripití pa apoyá FARC, riba petishon di Bogotá aña pasá a intermediá pa logra un interkambio humanitario ku lo pèrmití liberashon di mas o ménos 50 persona sekuestrá pa motibunan polítiko den man di e gueria iskierdista, pa mas ku shen milisiano presu.
“Mi ta kere ku a yega e ora pa FARC libra tur rehen ku ta den seru. Esaki lo ta un gran gesto, humanitario, ku kambio di nada, asina ami a plantia awor ku tin un hefe nobo”, Chávez a bisa durante su programa semanal di radio i televishon “Aló Presidente” for di Santa Ana de Coro, Venezuela, dor di referí na Alfonso Cano, kende a bira lider di FARC despues di morto di Manuel Marulanda, okurí 26 di mart último.
E lider venezolano a ekspresá ku “esei kisas tabata loke mi kier a bisa Marulanda”, i el a lamentá di no por a logra aprobashon di Colombia pa reuní kuné.
“Awor mi ke bisa Cano: libra tur hende! Tin hendenan muhé, ansianonan, hendenan malu, sòldánan kendenan tin asta 10 aña einan. A yega e ora, Cano, asina ami ta kere. E guera di guerianan a pasa pa historia!”, Chávez a sentensiá.
“Na e halturanan aki na Amérika Latina, un movementu gueriero armá ta for di òrdu, i tin ku bisa FARC esaki”, e lider venezolano a agregá.
Seguidamente, el a manifestá dor di dirigí n’e grupo gueriero, ku “boso a kombèrtí den un èksküs di e imperio pa menasá nos tur. Esaki ta e èksküs perfekto. E dia ku pas yega na Colombia, e èksküs di e imperio a kaba, e terorismo, manera nan ta bisa”.
FARC aktualmente tin 40 persona sekuestrá pa motibunan polítiko, inkluyendo e kandidata presidensial Ingrid Betancourt i 3 merikano.
Bogotá ta tratando prueba vínkulonan ekonómiko entre Chávez i FARC ku archivonan den kòmpiuter optené n’e kampamentu kaminda e di dos lider di e gueria, Raúl Reyes, a muri, i ku a generá tenshonnan diplomátiko entre ámbos pais pa e atake ku Colombia a ordená kontra e kampamentu na teritorio di Ecuador.
E Presidente di Colombia i e Presidente di Venezuela ta buskando drecha e relashonnan despues ku e mediashon Chávez ku FARC a terminá abruptamente na 2007 riba òrdu di gobièrnu di Alvaro Uribe.
“No ta mesun kos di ta den un prizòn será, ku será den mondi”, e mandatario a bisa, i el a rekòrdá e dos aña i mei ku e tabata enkarselá pa a enkabesá un intento di Gòlpi di Estado na 1992.
Chávez a referí ku un di e diferensianan ta ku e tabata risibí bishitanan di su famianan.
E Minister di Interior di Colombia, Carlos Holguín, a deklará ku e ta sorprendí pa loke el a kalifiká un kambio di aktitut di Chávez frente FARC, i a bisa ku e ta spera ku FARC lo skucha e proposishon nobo di e Presidente venezolano.
“Hopi bon! Ohalá FARC skuch’é! Ohalá ku Amérika Latina kompletu skuch’é!”, el a afirmá.
E deklarashonnan di Chávez ta representá un kambio di 180 grado relashoná ku su posishon frente e konflikto colombiano.
“Chávez ta un gran defensor di aliado di FARC. P’esei ta asina sorprendente ku el a aktua di e manera aki”, Minister Holguín a bisa telenotisia Caracol.
“Nos no ta hustifiká, ami nunka lo hasié, di tin den mondi un grupo di hende, sivilnan i militarnan”, Chávez a bisa.
“Ya basta ku asina tantu guera! A yega e ora pa sinta papia di pas. Esaki ta e boluntat di nos, e venezolanonan”, Chávez a añadí.
FARC, ku segun e analistanan, awor aki ta debilitá pa e gòlpinan konstante di Bogotá, na 2008 a libra 6 polítiko colombiano kendenan tabata sekuestrá, i despues Bogotá a disidí pone fin n’e ròl di mediador di Presidente Chávez.

Foto: Hugo Chavez 0906

Presidente di Venezuela Hugo Chávez ta papia ayera durante su programa semanal di radio i televishon “Aló Presidente’ na Santa Ana de Coro, Venezuela.

Foto; Alfonso Cano 0906

E lider venezolano Hugo Chávez a urgí lider nobo di FARC, Alfonso Cano, pa libra tur rehen sin nada a kambio.

Foto; Manuel Marulanda 0906

E mandatario venezolano Hugo Chávez a lamentá ku e no por a reuní ku Manuel Marulanda promé ku el a muri 26 di mart último.

Foto: Carlos Holguin 0906

Minister di Interior di Colombia, Carlos Holguín, a deklará ku e ta sorprendí p’e kambio di aktitut di Presidente Hugo Chávez.