WILLEMSTAD - “Ami lo vota na fabor di e 15 porshento, ora e proposishon di lei aki drenta parlamentu di Antia. Mi ta sigui kere ku un oumento di 15 porshento ta hustu i na su lugá aworakí,”asina parlamentario mr. Faroe Metry, motor tras di e oumento di sueldo mínimo a deklará.
KU esaki, Faroe Metry a ripití e posishon ku el a asumí for di kuminsamentu – i ku LA PRENSA a relatá ekstensamente kaba – ku e no ta kita for di su punto di bista ku esnan ku ta gana sueldo mínimo meresé un oumento di por lo ménos 15 porshento.
Metry a hasi e deklarashonnan aki, despues di e diskushonnan ku a surgi rondó di e tema aki, ku kasi-kasi a bira kontroversial.
Parlamentu di Antia, resientemente a trata e tema aki den un reunion di Komishon Sentral.
Básikamente tin tres proposishon riba mesa: e promé di parlamentario Faroe Metry ku a haña 18 miembro su tras, e proposishon di minister Elvis Tjin Asjoe ku ta na fabor di un oumento di 18 porshento, miéntras ku entretantu Banko Sentral di Antia, tambe a proponé un oumento, pero ménos fuerte, di 8 porshentu. Banko Sentral a basa su mes riba argumentunan ekonómiko, indikando ku ta esei ekonomia di nos pais por karga awor aki.
Den e reunion di parlamentu, a lanta e impreshon ku un mayoria frakshon ta na fabor di e último aki, esta e proposishon di Banko Sentral di Antia.
Pero a surgi un diskushon den e dianan ku a sigui i tin duda atrobe kiko kada frakshon ta para p’e.
Faroe Metry a rekòrdá ku e proposishon pa oumentá sueldo mínimo ku 15 porshento ta un proposishon ku a bin di parlamentu.
“E proposishon ta ankra den e derechi ku parlamentu tin, pa bin ku proposishon di lei. No ta un derechi ku parlamentu ta usa tur ora i generalmente tin motibunan hopi bálido, ora e bin ku un proyekto di lei asin’aki,” Metry a duna di konosé.
El a bisa ku un proyekto di lei asin’aki ta independiente for di loke gobièrnu su pensamentu ta, pasobra ta un inisiativa di parlamento.
Un dje puntonan ku a lanta basta diskushon den e dianan ku a pasa ta hecho ku e lider polítiko di partido Nashonal Ersilia de Lannooy lo a deklará den reunion di koalishon ku e ta na fabor di e proposishon di Banko Sentral pa subi sueldo mínimo solamente ku 8 porshento.
De Lannooy tambe ta konvensí, ku ta esei nos pais por karga awor aki.
Puntra pa un reakshon, Metry a bisa ku esei ta pleno derechi di e lider polítiko.
“Komo polítiko gobernante e por tin su mes pensamentu. Pero mi ta bolbe bisa, ku aki ta trata di un inisiativa di parlamentu. Kontrali na Banko Sentral, mi argumentashon ta basa partikularmente riba e aspekto sosial, di e gruponan ku ta ganando masha poko i ku meresé un oumento,” e parlamentario di Partido Nashonal a bisa.
E no kier a adelantá riba un eventual konfrontashon ku gobièrnu riba esaki.
“Un kos ta sigur: na momentu ku e proposishon subi mesa den un reunion públiko di Staten, ami lo vota na fabor di 15 porshento,” e parlamentario a sigurá.