WILLEMSTAD – “Ku aprobashon di e proposishon di lei pa introdusí e Kolegio pa Supervishon Finansiero (Cft), Kòrsou a pone un paso mas de direkshon pa kuminsamentu ku saneamentu di debe”. Esei, di akuerdo ku diputado di Finansa di Kòrsou Mike Willem.
Despues di hopi krítika, hopi konmoshon rondó di e trayekto aki, Bestuurscollege siman pasá a bai di akuerdo ku e kondishonnan den e Algemene Maatregel van Rijksbestuur pa instituí e kolegio menshoná.
E Algemene Maatregel van Rijksbestuur, ku ta regla supervishon finansiero tantu pa pais Antia, Kòrsou komo St. Maarten, lo ser tratá djarason awor den Komishon Sentral di Konseho Insular.
Ku e trayekto aki, gobièrnu di Kòrsou a pone un paso konkreto mas pa realisá e struktura finansiero temporal nobo pa Kòrsou ku lo keda vigente te ora Kòrsou haña su status di pais outónomo den Reino. Esaki ta enserá konkretamente ku ta instituí e Kolegio pa Supervishon Finansiero, College financieel toezicht.
Ta konosí, ku un dje problemanan mas grandi ku Antia, spesífikamente Kòrsou ta konfrontando awor aki ta e debe nashonal.
E úniko solushon viabel awor aki pa e debe aki, ku entretantu ta algu mas ku 5 mil mion florin, ta e proposishon di Ulanda pa tuma un parti supstansial di e debe aki pa su responsabilidat. Pero kondishon ku Ulanda a pone ta, ku Ulanda ke tin kòntròl riba maneho i situashon finansiero di e islanan.
Asina mes, tin krítika fuerte tantu den parlamentu ulandes komo pafó di parlamentu ku ta sèn di e pagadó di belasting ulandes ta bai kubri e défisit na Antia, algu ku hopi ulandes no ta masha di akuerdo kuné.
E islanan mas chikitu, Boneiru, Saba i Statia entretantu a bai di akuerdo basta luna pasá kaba ku e supervishon aki te ku nan ta trahando riba e proseso pa yega na un presupuesto balansa aki un par di aña.
Te ku awor, ta St. Maarten tabatin sierto problema ku e kondishonnan pero entretantu, despues di e último konsulta polítiko ku a tuma lugá luna pasá aki na Kòrsou, esei tambe ta solushoná.
Pa diputado di Finansa di Kòrsou Mike Willem, ku aprobashon di e medida aki, Kòrsou awor ta yegando mas serka pa haña e saneamentu di debe asina urgente.
Na momentu di traha presupuesto 2008, Kòrsou a sali for di punto di bista, ku e saneamentu di debe aki lo a bira un hecho pa e aña aki mes.
T’asina ku Konseho Insular, fin di aña pasá a trata i aprobá kaba presupuesto pa e aña koriente. E presupuesto ei tabata basá di un banda riba e promesa di Ulanda ku e ta karga un parti supstansial di e défisit di e aña aki – ku Kòrsou mes a kalkulá na 103 mion florin – miéntras ku a keda un défisit mas di 67.9 mion florin, ku teritorio insular di Kòrsou mes, mester a weta kon e ta finansiá esaki.
Pues komo ku esei no a sosodé, Kòrsou ta konfrontando awor aki ta un défisit adishonal.
Despues di trata e proposishon di lei den Komishon Sentral, gobièrnu ta spera ku e luna aki mes, Konseho Insular por trata e proposishon di lei aki den un reunion públiko.
Unabes aprobá den reunion públiko, e ta bai Staten i unabes aprobá den Staten, e ta bai Konseho di Minister di Reino pa aprobashon.
Diputado Mike Willem ta karga e speransa, ku kisas pa fin di e aña aki mes, e proseso di saneamentu di debe por kuminsá.