WILLEMSTAD - Frakshon di partido MAN ta preokupá pa loke el a yama un fenómeno kresiente kaminda ta pone personanan importante di un organisashon riba non aktif. Den mayoria kaso ta trata di miembronan di gerensia di un organisashon. Nos ke sa ta kiko ta pasando, asina Eugene Cleopa a puntra den un karta ku el a manda pa Bestuurscollege di Kòrsou.
Cleopa a splika, ku último tempu a bira masha normal ku ta pone gerensia riba non aktif.
“Lòs for di loke por a sosodé, nos ta haña e situashon aki un kos hopi serio, pasobra e ta tumando lugá riba gran eskala,” Cleopa a bisa.
El a mustra ku esaki ya kaba a sosodé na BZV, e ta menasá di sosodé na FKP, el a sosodé na Brasami, el a sosodé den kuerpo polisial i diferente otro kaminda mas.
Nos ke sa di gobièrnu, kiko realmente ta pasando, e konsehal a bisa. El a bisa ku ta komo si fuera ta un krísis tin den pais.
Un kaso di hopi resien ta esun di tayer sosial na Sta. Martha, kaminda a pone dos miembro di gerensia riba non aktif.
Siman pasá Konseho Insular a hasi un bishita di trabou na e tayer pa haña mas informashon riba funshonamentu di e instituto. E miembronan sinembargo no a logra den nan meta, pasobra e persona presente a indiká, ku e no tin outorisashon pa pèrmití e miembronan di Konseho Insular subi tereno.
Pa Eugene Cleopa, esaki ta un kos inkonsebibel.
El a bisa, ku el a konstatá ku no tin guia optimal.
“Nos ta hopi preokupá, pasobra aki ta trata di un instituto ku ta dediká su energia i esfuerso na un grupo vulnerabel den nos komunidat, ku ta e grupo di personanan desabilitá. Pa hopi aña kaba e tayer aki a bin ta hasi bon trabou. Nos ke sa kiko ta pasando,” Cleopa a bisa.
El a bisa, ku mester yega na un klaridat mas lihé posibel riba e asuntu aki tambe.
Riba tur esaki, ta surgi awor un diskushon riba funshonamentu di Defensor di Pueblo, kaminda gobièrnu ta bisa, ku e no tin konfiansa mas den e persona aki.
“Ta kiko nos ta pasando aden? Ta un krísis di konfiansa ta surgiendo den e pais aki?” Cleopa a puntra finalmente.