WILLEMSTAD - Frakshon di Partido Niun Paso Atras i Partido Forsa Kòrsou den Konseho Insular a pidi un reunion públiko di Konseho Insular, pasobra nan ke sa kiko ta bai pasa ku Bureau Ziektekostenvoorzieningen (BZV) awor ku e kontrakt ku e kompania di eks konsehal mr. Dennis Evertsz ta kabando. Kiko ta bai pasa: ta prolongá e kontrakt, kiko ta hasi? asina e dos partidonan aki ta puntra den un karta ku nan a manda siman pasá pa Bestuurscollege.
Na desèmber aña pasá, Bestuurscollege, riba proposishon di diputado enkargá ku BZV Humphrey Davelaar a firma un kombenio ku Dennis & Co. pa hasi un evaluashon di funshonamentu di BZV i bin ku rekomendashon kon por mehorá e instituto.
BZV ta enkargá ku ehekushon di kuido médiko pa teritorio insular di Kòrsou den sentido ku e ta e instansia ku entre otro ta paga kuentanan médiko di tur ámtenar i ta duna rekomendashon ora mester manda un pashènt eksterior pa tratamentu médiko mas avansá.
E proseso di saneamentu aki a kondusí na basta malkontentu entre gobièrnu i personal di e instituto, prinsipalmente dia a tuma e desishon di pone Victor Monk, ku tabata fungi komo direktor, riba non aktif.
E trahadónan a konsiderá ku no tabatin niun motibu pa esaki, pió ainda, nan tabata konsiderá ku Monk tabata hasiendo un bon trabou.
Monk mes tambe tabatin mesun opinion i a entamá un kaso den korte pa kita su posishon di non aktif i pon’é bèk na trabou, un kaso ku el a gana tambe. Gobièrnu a apelá e veredikto i próksimamente mester atendé esaki den korte di apelashon.
Tabatin un miembro mas di gerensia ku a hiba direktiva di BZV korte, pero el a pèrdè e kaso. Un di tres miembro di gerensia a pidi pa tèrminá su kontrakt di trabou na un manera elegante.
Punto ta, ku e trabounan di drechamentu di funshonamentu di BZV ta tumando mas tempu ku a pensa. E kompania ainda no a finalisá su tarea, pero e seis lunanan di su kontrakt ta kabando.
Nombramentu di Dennis & Co. na BZV a okashoná basta malkontentu, pasobra hopi a weta e asuntu aki komo un forma ku diputado Davelaar (di Partido Nashonal) a faboresé un miembro di su partido den e kaso aki. Diputado Davelaar mes a splika na numeroso okashon kon e proseso a kana i a rechasá enérgikamente ku tabatin asuntu di faboresimentu di un eksponente di su partido.
Tantu Forsa Kòrsou komo Niun Paso Atras ke sa awor, kiko ta bai sosodé. Ku e meta aki na bista, nan a pidi un reunion públiko di Konseho Insular.
Nan a pidi pa haña un bista di e situashon ku e empresa a topa dia el a kuminsá ku su aktividatnan di saneamentu.
E dos partidonan aki alabes ke sa si tin chèns ku ta prolongá e kontrakt ku Dennis & Co.