WILLEMSTAD – Hóbennan ku bin den kontakto ku hustisia, den futuro lo por haña un transakshon i partisipashon na un proyekto. Ku introdukshon di e Kódigo Penal nobo lo hasi su entrada e lei di kastigu pa hóben. Den kuadro di esaki a krea e proyekto Sino Fono.
E proyekto Sino Fono ta resultado di preparashonnan di tantu Ministerio Públiko komo Kuerpo Polisial. E preparashonnan akí a tuma lugá na 2007. Huntu ku e kuerpo di polis di Rotterdam ta dunando e proyekto mas kontenido na e momentunan akí. E proyekto Sino Fono ta derivá for di e proyekto ulandes HALT. Hóbennan ulandes ku haña nan mes den kontakto ku hustisia pa promé bia i pa delitonan chikí, den sierto kasonan por skohe pa partisipá na e proyekto pa evitá ku nan ta haña un karchi di kastigu. A tradusí e proyekto akí pa Kòrsou i a yam’é Sino Fono. Sea ta partisipá na e proyekto òf ta haña un kondena i un karchi di kastigu.
Pa yega na un proyekto sólido a kuminsá aña pasá preparashonnan huntu ku Voogdijraad, Ministerio Públiko i polis. Durante e asina yamá ‘casus-overleg’. Durante e seshonnan akí ta studia kasonan penal di hóbennan, sea será òf den libertat. Komo ku e diferente Wijkteamnan no ta disponé di un kordinadó pa hóben, mester envolví e departamentu di ‘Jeugd en Zedenzaken’ durante e preparashonnan. Pa e aña akí lo kontinuá ku e intentonan pa yega na un departamentu di reklaseren pa hóben inkorporá den Voogdijraad.
Den konsulta ku e Direktorado Hubentut i Hóben a stipulá pa Kòrsou un asina yamá ‘strafrechterlijk handhavingstraject’ pa mantenshon di e lei sosial di enseñansa obligatorio. Esaki a resultá den e protokòl mantenshon Ministerio Públiko manera inkorporá den e manual formashon sosial obligatorio. Na 2007 e fiskal enkargá ku hubentut a bishitá e Kas di Seguridat Alkmaar/Den Helder i Tilburg. Den transkurso di e di dos mitar di 2007 a studia kon deseabel introdukshon di e modelo di koperashon ‘Kas di Seguridat pa Hóben’ ta.