Tata
Dos informashon riba tata a hala mi atenshon den siman ku a pasa. Tabata unu di e echo ku na Oustralia tin anualmente sigur 4 hende hòmber ku ta kometé suisidio, pasobra nan a divorsiá i no por wak nan yunan i publikashon di un buki kaminda ku tatanan por kontestá pregunta i asina dokumentá nan bida pa nan por konta nan yunan.

Pa kuminsá ku e situashon di tatanan divorsiá na Oustralia. Riba e wèpsait
www.lonefathers.com.au por mira kon hende hòmbernan divorsiá apesar di mitonan ku tin den nan komunidat tambe, a lanta pa nan derechi komo tata. E situashon a bai asina leu, ku tin polítiko ku a sali na defensa di e tatanan divorsiá ku ke mira nan yunan i tin mas di bisa riba desaroyo di nan yunan, maske nan no ta ku mama di e yu(nan) mas.
Realisando ku un mucha mester di su mama i su tata pa su desaroyo, mi a haña ku ta bon ku un informashon asina ei ta sali den publisidat. Mi mes tin basta biaha impreshon ku hopi hende hòmber (no tur) no ta preokupá pa nan yunan despues di divorsio. I mi tin e impreshon ku ta mama ta haña e yunan mayoria biaha, pasobra e tatanan mes no ta interesá pa keda ku e yunan i tur doló di kabes ku ta bini ku edukashon di un yu. Un moveshon manera na Oustralia ta yuda e hende hòmber ku no por soportá e echo ku e no ta mira su yunan òf ku e no ta biba ku su yunan. I e kontakto pa e muchanan ta muchu importante, pero ami sigur ke aksentuá ku mester wak kada kaso separá, pasobra realmente tin tata ku pa (sigui) ofendé e mama, lo hasi masha trankil, kualkier daño na su mes yu.

Di dos informashon ku a impreshonámi ta e buki di Carl Breeveld na Sürnam ku yama Papa's Tori (Historia di Tata). Breeveld ku su fundashon Man Mit’ Man a traha un buki kaminda tatanan na un manera sistemátiko por skibi nan historia di bida kontestando preguntanan riba diferente tema. E tatanan di e forma aki por yega na informashonnan balioso ku nan por duna nan yu i asina ei laga nan yunan sa ken nan ta loke ta bon atrobe pa identidat di e yu i pa historia di su bida.

E dos informashonnan aki ta parse relevante sufisiente pa hasi algu asina aki na Kòrsou tambe. Kaminda ta parse ku falta sosten pa e tata ku ta serio i ku realmente lo ke ta un bon tata pa su yunan. No e tata pantomina.
Nos ta yen di mito i kuentanan di fantasia di kon un hòmber mester ta, loke ta duna oportunidat pa tatanan faya den formashon di nan yunan na promé lugá komo hende i despues komo hòmber òf muhénan responsabel.
Si tabatin mas sosten pa tatanan den nos komunidat kisas lo tabatin mas hende hòmber ku lo a karga nan responsabilidat for di kuminsamentu òf ku na kaminda ta realisá ku ta di otro manera tin di trata ku yu ku bo a pone riba mundu.

Kada hende hòmber den nos komunidat ku seriamente ke karga responsabilidat pa nan famia i pa nan yunan lo a benefisiá si stòp di sostené mitonan i kuentanan di fantasia. Den un komunidat manera di Kòrsou, kaminda hopi hende hòmber no por kria nan famia pasobra nan no tin e entrada òf nan ta gana (muchu) ménos ku nan kasá òf partner, mester bini tambe un madures di nos hòmbernan mes pa nan sa ku nan mes mester tuma akshon si nan ke sierto kambio i nan mes mester ta fuerte sufisiente pa desbaratá mito i kuenta di fantasia riba nan papel komo hòmber, tata i ‘kabes’ di famia.

Banda di yen kos ku ‘nan di’ ku mester pasa ku no ta bèrdat, nos hòmbernan ta sintá, ku pa motibu di mesun mito i kuentanan di fantasia, nan no por bai buska yudansa i sosten serio pa evitá ku nan ta (sigui) deskuidá, faya, abusá di kasá/partner i yu(nan) i destruí harmonia den kas. Bo mes tambe ta haña ku ta imposibel kere ku ta un hende felis ta faya ku e famia ku kasi semper ta e mes a skohe pe.

Mester buska un solushon i yudansa pa e tata serio ku ke i meresé i ku ke pasa dia di tata felismente ku su yunan.

Bon siman i chèk mi blòg na www.notabel.com.
Por komuniká ku Reyna Joe na info@notabel.com.