WILLEMSTAD - E lei ku gobièrnu ke introdusí pa regla supervishon finansiero pa Kòrsou i Antia ta un lei di vital importansia. Nos ta papiando aki di un lei di Reino i pa bon kana e proseso di un lei asin’aki, bo mester tin por lo ménos e konsehonan nesesario, manera esun di Raad van Advies. Anto te asina leu ku nos por a averiguá, ni sikiera a pidi e konseho aki ainda, asina Charles Cooper lider di MAN a denunsiá.
Parlamentu di Antia ta reuní djaweps awor, riba petishon di partidonan di koalishon pa fiha posishon di Staten riba e lei ku mester regla funshonamentu di e Kolegio pa Supervishon Finansiero. Awor aki ta den rekta final ku aprobashon di e lei aki. Unabes e lei ta na lugá, Ulanda por kuminsá ehersé kòntròl riba maneho finansiero di Kòrsou, St. Maarten i Antia.
Esaki alabes ta kondishon pa kuminsá ku e proseso di saneamentu di debe di nos pais.
Di akuerdo ku Gobièrnu Sentral den su karta pa parlamentu, ta e intenshon pa trata e proposishon di lei aki den Konseho di Minister di Reino dia 12 di yüli benidero.
E lider di MAN a bisa, ku e no ta komprondé pakiko tin asina tantu purá pa pasa e lei aki. Nos ta papiando aki di un lei ku tin konsekuensianan grandi pa pais, anto un lei asin’aki bo mester studi’é bon promé i bo mester tin tur e konsehonan relevante riba mesa promé, el a bisa.
Charles Cooper ta konsiderá e forma ku a atendé e asuntu te ku awor, kontra lei, inkorekto i kontra prosedura ku normalmente ta mantené den tipo di kasonan asin’aki.
“Nos no ta papiando aki di un proyekto di lei pa oumentá ònderstant, nos no ta papiando di asuntu di drecha un kaya. Aki nos ta papiando di un lei di Reino, pa kua mester kana un sierto prosedura. Ta un asuntu hopi mas fundamental i esei mester ta kompañá ku e konsehonan nesesario. Ta inkonsebibel ku gobièrnu ke trata e lei aki, sin ku e konseho aki t’ei,” Cooper a bisa.
El a bisa, ku loke e ta haña straño ta, ku na Ulanda si ta kanando e trayekto aki manera mester ta. Sekretario di Estado Ank Bijleveld si a raportá na Tweede Kamer i korektamente a mustra ku e lei aki mester kana e kaminda legal ku mester kana ainda, pa aprobá e trayekto.