WILLEMSTAD - Shofùrnan di bùs ta bastante indigná pa e hecho, ku miéntras ku e tarifanan pa e diferente destinashonnan na Kòrsou no ta kompletamente kla ainda, Servisio pa Asuntunan Ekonómiko (DEZ) a laga su funshonarionan kuminsá kontrolá kiko kada shofùr ta kobrando pasaheronan. E kòntròl aki a bai den kombinashon ku funshonarionan di Departamentu di Transporte Públiko.
Esei a sosodé ayera den oranan di mainta na e parada di bùs tantu na Otrobanda (Paris) komo na Punda.
E shofùrnan a haña nan ku e funshonarionan di DEZ riba nan, anto sin por a komprondé ta kiko ta pasando, asina Andres Everitz, bosero di e direktiva di Sindikato Transporte Uní, STU a indiká.
El a bisa, ku for di oranan di mainta miembronan di e sindikato a kuminsá ta yam’é, reklamando e hecho ku tin kòntròl ta tumando lugá siendo ku e asuntu no ta kompletamente reglá.
Segun Everitz, no ta awor aki, pero pa algun dia kaba e sindikato ta mustrando ku mester kaba di regla e asuntu di tarifa. Despues di e último reunion ku e sindikato tabatin ku Bestuurscollege kaminda a palabrá ku e tarifanan nobo lo drenta na vigor, tabatin konfushon kaba ta kua tarifa mester mantené final di kuenta.
E lista no tabata kompleto, ademas e no tabata koherente, segun Everitz.
“For di basta dia kaba nos ta mustrando gobièrnu ku a bin diferente bario nobo na Kòrsou, pa kua nunka promé a fiha tarifa. Loke ta pasa ta e ora ei, ku e shofùr ta kalkulá e mes kiko ta hustu pa e kobra riba e rutanan ei.
Anto ora no tin un tarifa ofisial stipulá pa gobièrnu, ta kiko gobièrnu ta kontrolá? No tin nada tòg pa tene bo mes na dje?” Everitz a puntra.
Everitz a bisa di no por kita for di e impreshon, ku hefe di DEZ Ramon Chong no tabata na altura niun ora so, ku e kòntròl tabata tumando lugá.
El a bisa di ta basa esei riba e hecho, ku na momentu ku el a konfrontá e hefe di servisio ku e situashon, esaki a reakshoná sorprendí i a bisa di no sa di nada. Ta parse nos ku gobièrnu ta atakando shofùr di bùs personalmente, komo si fuera gobièrnu tin algu kontra nos komo shofùr di bùs, el a bisa.
Everitz a bisa tambe, ku e kaso tin un tinte straño, pasobra na momentu ku el a yama medionan di komunikashon pa denunsiá loke ta pasando, el a tuma nota ku e funshonarionan di tantu DEZ komo Transporte Públiko a bandoná e sitio mesora.
Everitz a bisa finalmente, ku e ta spera ku lo haña un solushon pronto pa e problemanan ku shofùrnan di bùs ta konfrontando. E solushon aki mester bin pronto, pasobra ta un hecho ku shofùrnan ta birando víktima di un situashon di konfushon.
“Kuestion ku pasaheronan ta drenta bùs, despues baha bai sin paga, no ta algu inkomun. Kuestion ku pasahero ta drenta bùs i ora di paga ta bisa ku ta solamente 1,50 e tin no ta kos straño. Anto nos ta kere ku mester reglamentá e asuntu aki, promé ku e sali for di man por kompleto,” Andres Everitz a agregá.