WILLEMSTAD - Lider di frakshon di Forsa Kòrsou den parlamentu antiano mr. Nelson Navarro ta para tras di proposishon di lei pa oumentá sueldo mínimo ku 15 porshento.
“Nos ta kere ku un oumento di 15 porshento ta na su lugá”, asina Navarro a komentá riba e diskushon ku a surgi rondó di e materia aki.
Parlamentu di Antia, resientemente a trata e tema aki den un reunion di Komishon Sentral. Básikamente tin tres proposishon riba mesa: e promé di parlamentario Faroe Metry ku a haña 18 miembro su tras, esta e proposishon pa oumentá sueldo mínimo ku 15 porshento, e proposishon di minister Elvis Tjin Asjoe ku ta na fabor di un oumento di 18 porshento, miéntras ku entretantu Banko Sentral di Antia, tambe a proponé un oumento di solamente 8 porshento. Banko Sentral a basa su mes riba argumentunan ekonómiko, indikando ku ta esei ekonomia di nos pais por karga awor aki.
Den e reunion di parlamentu, a lanta e impreshon ku un mayoria frakshon ta na fabor di e último aki, esta e proposishon di Banko Sentral di Antia, pero a surgi un diskushon den e dianan ku a sigui i tin duda atrobe kiko kada frakshon ta para p’e.
Tal manera nos a informá ayera kaba, esun ku a tuma inisiativa pa bin ku e proyekto di lei aki, parlamentario mr. Faroe Metry ya a indiká ku na momentu di vota, e lo vota na fabor di su propio proposishon di lei pa un oumento di 15 porshento.
Nelson Navarro a bisa, ku for di durante e reunion di Komishon Sentral di parlamento, su frakshon a ekspresá su mes na fabor di un oumento di 15 porshento di sueldo mínimo i ku e ta para tras di parlamentario Metry.
“Nos tin komprenshon pa e punto di bista i e konseho ku Banko Sentral a manda pa Staten, esta ku mirando situashon ekonómiko i finansiero di pais, ta 8 porshento ta responsabel awor aki. Pero hustamente esei ta e punto: Banko Sentral a usa argumentunan finansiero, ekonómiko i monetario pa hustifiká su posishon. Forsa Kòrsou ta kere ku mester mantené rasonnan sosial tambe komo un dje faktornan ora ta huzga e asuntu aki,” Navarro a trese dilanti.
E lider di Forsa Kòrsou a mustra, ku e 8 porshento proponé pa Banko Sentral simplemente no ta sufisiente. Es mas: si nos ta papia di un ekonomia ku ta kresiendo, si nos ta papia di un pronóstiko di 3.5 porshento di kresementu den 2008, anto ta mas ku hustu ku tur sektor, inkluso esnan ku ta gana sueldo mínimo, mester por probechá di esaki, el a bisa.
“Si nos weta kon preis di komestibel pa subi último lunanan, preis di práktikamente tur kos den bida a konosé un oumento bárbaro, anto e pregunta ta kon e grupo vulnerabel aki por mantené su mes na bida. Si no mester pone un peso demasiado riba nos ekonomia, si mester garantisá ku ekonomia ta sigui krese ta un hecho, pero di otro banda e ta nifiká si, ku mester buska un balansa sosial den esaki. Forsa Kòrsou ta konsiderá, ku ta deber di gobièrnu pa mantené e balansa sosial aki. Ta gobièrnu mester atendé ku asuntu di preis ku ta subi, ta gobièrnu mester ehersé e kòntròl nesesario pa garantisá ku tur hende por sobreviví, Nelson Navarro, lider di Forsa Kòrsou a bisa finalmente.