WILLEMSTAD - Un kantidat di mas ku 550 persona a partisipá djasabra último na e simposio ku Fundashon Prinses Wilhelmina Fonds a organisá tokante Kanser na Prostat. Un públiko grandi, a duna oido na e invitashon di Prinses Wilhelmina Fonds. Práktikamente e sala di New Song na Muizenberg tabata yen yen. Un kos bunita di esaki tabata tambe, ku mas di 80 porshento di e presentenan na e simposio tabata hende hòmber. Esaki ta demostrá ku tin un nesesidat, un interes i preokupashon serka nos hende hòmbernan pa nan informá nan mes tokante e malesa di kanser na prostat. Alabes por konkluí tambe, ku tin un nesesidat i interes grandi serka nos komunidat general pa haña informashon, prinsipalmente ora ta trata informashon kon biba mas salú i kon pa alsa nos kalidat di bida. E simposio aki ta forma parti integral di e kampaña di informashon i konsientisashon “Luna Blou” di Prinses Wilhelmina Fonds, ku lo kore den henter luna di yüni. Prinses Wilhelmina Fonds a indiká, ku nan lo sigui organisá e tipo di simposionan manera esaki, ya komo ku dje forma aki nan por yega mas direkto i estrecho den kontakto ku nos komunidat.
Durante e simposio, un kantidat di 11 oradó, tur spesialista den nan ramo, a papia tokante diferente aspekto di prostat, kanser na prostat i tambe riba e tratamentunan ku ta eksistí. Por lo general por bisa, ku e públiko a keda sumamente enkantá i satisfecho ku e informashon ku nan a risibí. Na final di e simposio, tres persona a duna nan testimonio i eksperensia ku e malesa di kanser. Esaki a haña un apresio i akohida hopi grandi serka e públiko. Prinsipalmente e konseho i yamada ku e tres personanan aki a hasi na nan koleganan maskulino, pa nan laga kontrolá nan prostat. E punto aki a ser tumá hopi na serio dor di tur presente. Ku e presentashon di e tres pashèntnan di kanser di prostat, por bisa ku nos ta den bon kaminda pa kibra ku e “taboe” ku tin riba e tópiko di prostat i kanser na prostat den komunidat.
Banda di e simposio pa e públiko general, Prinses Wilhelmina Fonds a tene tambe un simposio dirigí riba dòkternan di kas. Por bisa ku e akohida di esaki tabata basta grandi, kaminda un kantidat di 25 dòkter a partisipá. Durante e simposio di e dòkternan, nan a trata diferente kaso i a presentá kon pa promové pa e komunidat bai hasi mas kòntròl riba nan prostat. E dòkternan ku a sigui e simposio lo haña un akreditashon spesial pa esaki.

Eksposishon

Manera a keda indiká, durante henter luna di yüni Fundashon Prinses Wilhelmina Fonds lo sigui ku su kampaña “Luna Blou” di informashon i konsientisashon tokante prostat i Kanser na Prostat.
E siguiente evento lo ta un eksposishon di arte ku lo tuma lugá den “Galeria Alma Blou”. Ta trata di un eksposishon di diferente artista lokal maskulino, ku a mustra nan disponibilidat, pa produsí un obra i pone esakinan den un eksposishon. Tur e kuadronan aki lo ta na benta na e públiko bishitante. Tur e fondo ku keda produsí dor di e benta di e obranan ta bai pa Fundashon Prinses Wilhelmina Fonds. E eksposishon lo keda habri durante e periodo di 21 di yüni te ku 5 di yüli. Apertura ofisial di e eksposishon ta riba djabièrnè 20 di yüni pa 7.30’or di anochi. Lo bai tin obranan di entre otro e siguiente artistanan: Papi Adriana, Edy Baetens, Norman van Bergen, Steve Bridgewater, Clemens Briels, Frans Brugman, Jose Maria Capricorne, Nelson Carrilho, Richard Doest, Didi Domatilia, Marcel van Duijneveld, Ralph Elisabeth, Jan Gilbert, Robert van Haren, Rien te Hennepe, Junius Isenia, Elis Juliana, Yubi Kirindongo, Erwin Kranenburg, Henk Leue, Ashley Mauricia, Andre Nagtegaal, Arthur Oster, Philip Rademaker, Ced Ride, Roald “Arti” Schotborg, Wop Sijtsma, Jan Toeter, Carlos Tramm, Anthon Vrede i Joes Wanders.
Fundashon Prinses Wilhelmina Fonds pa medio di esaki ke gradisí tur e públiko ku a duna oido na nan invitashon i ku a partisipá na e simposio. Ta nan presensia a hasi e simposio aki un éksito. Tambe Fundashon Prinses Wilhelmina Fonds ke gradisí speshalmente e organisashon Ride for the Roses i tambe Astra Zeneca, KLM i Fun Miles pa nan kontribushon. Danki na e instansianan aki su aporte, Fundashon Prinses Wilhelmina Fonds por a hasi e simposio aki grátis pa públiko.