WILLEMSTAD – Djadumingu den ouditorio di Selikor tabatin e final di e kompetensia ‘di Lèter pa Palabra’. Un total di 25 skol i 64 partisipante a kompetí den e di tres i último ronda. Na final di e kompetensia a saka e 3 alumnonan ku por deletrá mas mihó, kada unu den nan kategoria di edat.
E promé kategoria tabatin partisipantenan entre 6 pa 8 aña, Yevgeny Stephens di Skol Imanuel a keda komo último den su kategoria. Pa e di dos kategoria ku tabatin partisipantenan di 9 pa 11 aña a keda Katherine Cabrera ku a representá PL Brionschool komo último den su kategoria. Na final di e anochi a keda Giomaris Barbara último entre e partisipantenan di 12 pa 14 aña ku a deletrá e palabra korekto representando Kolegio Don Sarto.
Mester bisa ku kada kategoria tabata unu maratóniko. Kada un di e 64 finalistanan a sa di hiba un bon bataya. Den kada kategoria e partisipantenan a bai no ménos ku 15 ronda di deletrá. Konklushon ta ku e trabou di e huradonan no tabata nada fásil pa eliminá e partisipantenan ku a bini ku yen entusiasmo pa kompetí.
Inisiadónan di e proyekto ‘di Lèter pa Palabra’ Selikor, Banco di Caribe, Fundashon Kòrsou Limpi Bunita i NRG ta felisitá tur e 64 partisipantenan pa e kurashi ku nan tabatin pa para dilanti un kuerpo di hurado i deletrá den nos dushi idioma papiamentu. Nan a sa di hasi un tremendo trabou i a sa di demostrá nan talento i abilidatnan pa trese un produkto di kalidat. Na tur e skolnan ku a partisipá i tambe na e mayornan ku a guia e partisipantenan, pabien i sigui ku e bon trabou.