WILLEMSTAD - Algun aña pasá e idea pa lanta un Internet Exchange na Kòrsou a wòrdu lansá. Trámitenan hasi durante aña nan nunka a konkretisá den algu faktibel. Dos luna pasá, bou di presidensia di minister di Tráfiko i Telekomunikashon Ir. Maurice Adriaens i koperashon di diputado Anthony Godett di infrastruktura, mayoria di e provedornan di Internèt na Antia a bini huntu pa firma un dokumento mustrando nan intenshon pa traha huntu riba e materia aki. Djabièrnè último finalmente esaki a wòrdu konkretisá ku lantamentu di Caribbean Internet Exchange. “Esaki ta otro fase den afan di e Gobièrnu aktual pa sigui mehorá kalidat di Internèt i hasié mas aksesibel pa komunidat kompleto”, minister Adriaens a bisa.
Direktornan di UTS, Digicel, Scarlet, Mio, Telbo a hasi akto di presensia na notario Alexander i firma e dokumento pa funda e entidat hurídiko ku ta bai operashonalisá e Internet Exchange. Caribbean Internet Exchange lo haña su base na Kòrsou, pero intenshon ta pa ekspandé su área di operá. Durante e selebrashon, diputado Anthony Godett a yama kada unu di e direktornan danki pa nan liderato i vishon demostrá ku a hasi posibel ku den un temporada korto por a lanta e Internet Exchange.
Mandamentu di e-mail ta algu ku hopi ta hasi diariamente i e kantidat ta subiendo enorme. Hopi di e-mail nan ta sali Kòrsou bai e sentral na Miami i bini bèk Kòrsou. Pa hasi e konekshon aki posibel, kabelnan ku kapasidat grandi ta nesesario. Konsekuentemente esaki ta buta ku mester kumpra hopi kapasidat riba e kabelnan aki lokual ta kostoso. Asina preis di Internèt ta keda haltu. Ku establesementu di un Internet Exchange na Kòrsou, e-mail nan aki no mester di bai Miami mas. Esaki ta buta ku e kapasidat riba e kabel por ta ménos òf wòrdu usá si pa hasi otro kos nan riba Internèt. E benefisio aki mester resultá den probecho pa nos tur ku ta hasi uso di Internèt. Tambe ta ampliamente konosí, mira e-commerce park, ku teknologia ta krea kupo di trabou ku ántes nos lo no a pensa riba dje. Pa un Internet Exchange esaki no ta otro i tambe lo krea kuponan di trabou.
E siguiente fase lo ta kompra di e apertura sofistiká i nesesario pa hasi e trabou nan di e Internet Exchange posibel. Minister Maurice Adriaens a enkargá e ekspertonan di Bureau Telecommunicatie & Post ku e tarea aki.
Durante su bishita di trabou na Trinidad, sekretario general di CANTO a invitá minister Adriaens pa hasi un presentashon na e konferensha di CANTO ku lo tuma lugá den yüli awor. “Keremi, mi ta bai hasi máksimo uso di e oportunidat aki pa nos promové Caribbean Internet Exchange, paso nos foko no ta solamente Antia, pero Karibe i Latino Amérika tambe. Tur ku ke uni forsa ta bon bini”; minister Adriaens a bisa.