WILLEMSTAD – E prohibishon pa kria kachó pitbull na Ulanda ta kaduká. Ku e medida akí ta stòp di mata kachónan pitbull, manera ta hasiendo for di aña 1993. Esaki ta loke minister Gerda Verburg enkargá ku Agrikultura, Naturalesa i Kalidat di Kuminda a informá.
E Areglo Kachónan Agresivo a drenta na vigor na Ulanda, despues ku 3 mucha a muri a konsekuensia di mordé di pitbull. E areglo a hasi posibel, ku por a konfiská tur kachó pitbull i mata nan. Sinembargo e kantidat di insidentenan ku kachó pitbull no a baha for di dia ku a introdusí e medida. Esaki ta konklushon di e komishon Van Sluijs ku a evaluá e efektonan di e medida. A resultá ku e kantidat di kachó pitbull ku ta envolví den kasonan di mordementu ta mas haltu ku serka otro rasanan, pero ku ta trata di un grupo chikí di tur e pitbullnan ku tin na Ulanda. Konsekuentemente esaki no ta hustifiká e matamentu di e kachónan akí. Van Sluijs ta mira mas den dunamentu di informashon na doñonan di pitbull.
Pa e motibu akí Verburg a anunsiá, ku ta bini reglanan nobo na lugá di esun aktual. E regla aktual ta prohibí pa kria kachó pitbull i laga nan pari. E regla nobo no ta basa su mes riba aspekto i rasa, pero ta laga komportashon agresivo di e kachó disidí. Tur kachó agresivo ku ta midi 35 centimeter for di skouder mester pasa un tèst di agresividat serka un eksperto. Si resultá ku karakter di e kachó ta agresivo di un manera apnormal, por laga mat’é ainda. Pero pa hasi esaki mester laga traha un tèst nobo, ya ku e métodonan aktual pa tèst no por pronostiká bon agreshon serka kachónan.
Ku e tèst nobo pa kachónan agresivo, minister Verburg ta kumpli ku e deseo di Tweede Kamer. Na mart 2007 e miembro di Tweede Kamer pa CDA Ormel a boga pa introdukshon di un tèst obligatorio. Segun Ormel tabatin insidentenan kaminda otro rasa di kachó a morde. No solamente pitbull ta peligroso, tambe otro kachónan ku múskulo. Pues un tèst di komportashon mester a sòru pa un solushon. Pa motibu ku alkaldenan ta haña un ròl grandi den mantenshon di e lei nobo, e minister a tuma kontakto ku e Organisashon di Munisipionan ulandes (VNG). Alkaldenan por laga konfiská kachónan i someté nan na e tèst. Den kasonan serio por asta hasi uso di e Kódigo Penal.
Na Ulanda tin aktualmente 180 pitbull ta warda riba nan morto. Ta trata di kachónan ku a konfiská den transkurso di último añanan. E matamentu ta stòp inmediatamente. Ministerio Públiko ta bai evaluá awor si e kachónan ta agresivo di bèrdat. Si no ta asina, ta duna e doñonan nan kachó bèk.

Kòrsou
Entretantu na Kòrsou a kaba di drenta na vigor e lei ku ta regulá kachónan peligroso. E lei akí ta enserá ku tur doño di pitbull mester registrá nan kachó. Gobièrnu a kaba di prolongá e temporada di registrashon, debí ku ta solamente 600 doño a hasi uso di e periodo pa registrá. Ta kalkulá ku na Kòrsou tin 4000 kachó pitbull. E lei nobo ku a drenta na vigor resientemente ta obligá tur doño di pitbull pa implantá un chep den kueru di e kachó. Tambe e doño mester sterilisá e kachó mes ora i tené será den un kurá for di kua e no por sali. Na porta di kurá di e kas e doño mester pone un atvertensia ku den e kurá tin kachó pitbull. Finalmente e doño mester bisti e kachó un bosá i mar’é na un kadena si e ke sali kuné riba kaya. E kadena no tin mag di ta mas largu ku 1.50 meter. Si un doño di un kachó pitbull no kumpli ku e reglanan akí, polis por konfiská e kachó i via un proseso di Ministerio Públiko por laga mat’é.