WILLEMSTAD – E tim di vigilansia di Bon Futuro un bia mas a lokalisá un kantidat di droga destiná pa prezunan den e instituto. E droga tabata paketá den forma di bala i skondé pafó di e tereno. Dos detenido tabata trata na piska e droga for di pafó di e waya di prizòn.
Tabata djaluna atardi den transkurso di 2’or, ku e efektivonan di vigilansia a nota dos detenido kantu di waya parti paden di prizòn. Nan tabata aktua di un forma sospechoso i mes ora a alertá personal di seguridat ku a yega rápidamente i a detené e dos personanan. Un di nan tabata bon skondí bou di un tapol kant’i waya i tabata kòrtando e waya. E otro detenido tabatin un artefakto, ku kua e tabata purba piska e balanan di droga. Nan tabatin un grandura di un bala di sòftbòl, i un tabata kontené mariwana i vlui i dos otro tabata kontené mariwana.
E detenidonan tabata hasiendo nan labornan rutinario den e área, pero a trata di burla un biaha mas di e personal bou di ora di trabou. Sinembargo sin éksito. Gerente di Bon Futuro a informá ku e detenidonan ta keda será pendiente e medidanan disiplinario ku lo tuma kontra nan. Gerensia di prison ta asentuá tambe ku hopi ta esnan ku ta pidi pa nan traha, debí ku ta awor proyektonan di trabou a kuminsá kana den prizòn. Na mes momentu otro detenidonan ku ta haña chèns pa traha ta hasi mal uzo di e oportunidat i ta trata na trese kosnan ilegal den prizòn.
Gerensia di Bon Futuro ta bisa, ku nan ke manda un mensahe bon kla pa tur esnan ku ke trata na burla e sistema di seguridat di prizòn, ku nan mester tene debido kuenta ku a intensifiká e seguridat i no ta tolerá nada ku ta ilegal mas. Kambionan grandi i medidanan di seguridat intenso pa bienestar di tantu e prizoneronan mes komo e personal ta na kaminda. E proseso di solisitut pa mas funshonario di seguridat ta den full swing, meskos ku e brigada di kachó i kámaranan di vigilansia.