WILLEMSTAD – E barku Freewinds te ainda ta kontaminá. Despues di 6 siman ku outoridatnan di Salubridat Públiko a duna òrdu pa seya e barku kompletamente, e barku ketu bai ta enormemente kontaminá ku asbèst blou. Esaki ta loke tin skibí riba e sitio www.shortnews.com.
Den e artíkulo por lesa, ku for di 1987 lidernan di e religion Scientology, ku ta doño di e barku, tabata notifiká. Na aña 2001, segun e relato, e arkitekto i èks miembro di Scientology Lawrence Woodcraft a bolbe notifiká e lidernan. Nan a skohe pa no tuma medida pa motibu ku nan a kere ku e supstansia asbèst blou, ku por kousa kanser, lo no hasi nan daño.
Mas aleu e artíkulo riba e sitio wèp ta informá, ku na e momentunan akí, grupo élite para militar di Scientology, ‘Sea Org’, ta na e sitio kaminda e barku ta mará, tratando na deshasí di e asbèst blou. Ekspertonan lo a bisa ku e trabou akí lo dura algun luna pa finalisá, si akaso esaki ta posibel mes. Tambe e trabounan lo kosta algun mion dollar.
E último informashonnan ku tabatin, sigur un luna pasá, di parti di DOK kaminda e barku tabata mará, a indiká ku e barku a haña un ‘clearence’ pa bandoná Kòrsou pa motibu ku no tabatin niun menasa mas di kontaminashon. A eliminá gran parti di e asbèst ku tabatin riba e barku, paket’é na forma responsabel i deshasí di dje tambe na forma responsabel. Den un kombersashon ku LA PRENSA tabatin ku direktor di Selikor algun tempu pasá, el a bisa, ku no por ekskluí ku e asbèst ta derá riba e tereno di Malpais. Entretantu tin un rapòrt di Servisio pa Asuntunan Ambiental ku a bai pa diputado Humphrey Davelaar.