CANASTOTA, New York – Larry Holmes, kende tabata kampion mundial di peso kompletu pa poko mas ku shete aña i a realisá 20 defensa di e título, a drenta Salòn di Fama di Bòkseo.
E 20 defensa ta e di dos reinado mas largu den historia di e kategoria.
Pero djadumingu, e “Asesino di Easton” tabatin mester di un ratu pa e rekuperá su mes promé ku el a aseptá e entrada den e Salòn Internashonal di Fama di Bòkseo huntu ku 11 otro kampion i personalidatnan di rin.
“Despensámi. Mi ta un poko emoshoná. Pakiko nò?”, Holmes a bisa, risibiendo un aplouso largu di un multitut di kasi 11.000 persona.
“Ora bo yega na e punto aki, ora e hendenan sali pa kumindá bo dje forma aki, bo ta haña gana di yora. Di manera ku si mi yora, yora ku mi pasobra mi ta sinti mi mes bon”, e bòksdó a agregá.
Holmes a enkabesá e indukshon (entrada) di 2008, den kua tabatin tambe e kampion wèlter junior Eddie Perkins i e defuntu peso mediano Holman Williams. Nan tres ta den e kategoria di Era Mordenu di e salòn.
E pesonan medio Len Harvey i Frank Klaus, meskos ku e wèlter Harry Lewis a ser honrá ku nan entrada den e kategoria di Tempu Bieu, miéntras ku e peso kompletu irlandes di siglo 19 Dan Donnelly a drenta e e Klase Pionero.
Holmes, kende a laga skol den di shete grado a usa su físiko den e plantanan produktor di stal na ost di Pennsilvania i el a refiná su habilidatnan di bòkseo den e gimnasio di Liga Atlétiko di Polis, tabatin un rekòrt di 69-6 ku 44 viktoria pa nòkout.
E tabata kampion di peso kompletu di 1978 pa 1985. Su 20 defensanan eksitoso di e faha ta superá solamente pa Joe Louis ku 25. Holmes kasi a empatá e rekòrt perfekto di Rocky Marciano di 49-0 ora el a ser derotá pa Michael Spinks.
Despues di un karera kòrtiku ku a inkluí 18 luna komo kompañero di treinen di Muhammad Ali, Holmes a derotá pa desishon e kampion di Konseho Mundial Ken Norton na Las Vegas, 9 di yüni 1978, ganando e pelea ku un último episodio konsiderá pa hopi komo un di esnan mas grandi den historia di bòkseo.
E kadena di defensanan eksitoso di e título a kaba pa Holmes na 1985 ora el a ser derotá pa Michael Spinks den 15 rònt pa desishon. El a retirá na 1986 despues di a pèrdè e revancha kontra Spinks.
Na 1988, Holmes di 38 aña a ser tentá pa sali for di retiro pa un bolsa di 3 mion dollar pa e enfrentá Mike Tyson, e kampion indiskutí. Tyson a kaba kuné den di kuater, e promé i úniko derota di Holmes pa nòkout den su karera. Holmes a bolbe retirá.
Na 1990, Holmes a bolbe drenta rin. Na 1992 el a derotá e kampion olímpiko peso kompletu di 1988 Ray Mercer, pero el a pèrdè pa desishon den pelea pa e título den 12 rònt kontra Evander Holyfield.
Holmes tabatin na 1995, ku 45 aña, un último chèns pa bringa pa e faha di Konseho, pèrdiendo kontra Oliver McCall.