Mucha cu hopi gana di scucha storia a ricibi e lesado cu man habri

ORANJESTAD - E siman di 2 pa 6 di juni tabata e prome siman di e proyecto di lesamento na cas : Bon nochi, drumi dushi.
E lesadonan a prepara nan mes bon pa haci e bishitanan segun nan lista. Prome cu e bishita di lesamento mayoria a bishita e famia pa cera conoci.Tin famia cu no por a warda riba e bishita di lesamento mes y ya durante e bishita di orientacion tabata entusiasma pa e lesado conta storia.
Tur caminda cu esaki tabata posibel e lesado a complace tambe cu e famia, den mayoria di caso e lesado a orienta su mes prome si y a delibira cu e mayor y e mucha tocante e contamento di storia riba e dos dianan planea.
No ta e lesadonan so a prepara, nan a yega haya stul’i zoya den huki poni, cusinchi riba flur den sala, cama drecha, patio cu stul den grupo poni, famia cla ta warda pa scucha storia.
Mucha cu hopi gana di scucha storia y hopi cu gana di conta nan mes tambe a ricibi e lesado cu man habri. Tin asta un lesado cu a haña un buket di bon bini di un mucha homber chikito. Tin varios mayor cu a gusta e meta di e proyecto y a duna nan nomber pa participa como lesado den luna di october, cu lo ta e di dos periodo pa aña 2008.
Tin mayor cu a ofrece pa nan yiu, cu ta gusta lesa, compaña e lesado un par di biaha como mascota y comparti e placer di lesamento cu otro mucha.
Despues di a pasa dor di algun dificultad cu number di telefon, cu tin biaha no tabata cuadra of a cambia y algun adres un poco leu pa bishita, e lesadonan tabata satisfecho cu con e proyecto a cana den e prome siman.
Fuera di e evaluacion cu nos mes a tene, nos a haña hopi comentario positivo riba e proyecto, esaki ta sigur un stimulacion mas pa e animo cu ya e lesadonan tin caba pa sigui bishita mucha y conta storia.
E echo cu tin mas y mas mucha cu ta haña caminda pa biblioteca, ta yena nan formulario di aplicacion pa un bishita y ta tir’e den e caha disponibel na bali, ta un desaroyo hopi positivo.
E bannernan na final di caya grandi na Playa y na haltura di Promenade na San Nicolas lo sigui haci nan trabou di promove e proyecto durante ful luna di juni.
Nos kier haci uzo di e oportunidad aki, pa un biaha mas laga comunidad di Aruba sa cu inscripcion pa e proyecto ta keda habri, nos ta warda tur aplicacion. E mucha cu Bon nochi, drumi dushi, no alcansa na bishita e luna aki, por conta cu nos na luna di october.
Bon nochi, drumi kier laga e scolnan cu no a logra fax nan lista ainda pa BNA sa, cu nan por haci esey ainda. Sigur te ultimo dia di scol y naturalmente den e siguiente aña di scol tambe.
Nos sa cu e scolnan ta hopi druk, vooral cu e preparacionnan pa rapport y clausura di e aña, pesey di parti di e proyecto nos kier duna nan un man y sigui yama pa recorda nan riba e listanan cu nomber di mucha.