ORANJESTAD- Fraccion di RED a ricibi un documento cu ta papia pa su mes, caminda a ricibi un copia di un concepto di Landsbesluit h.a.m. cu Gobierno di Aruba kier decreta cu ta mustra claramente cu Gobierno no tin e boluntad politico pa ehecuta e Rapport Fowler.
E rapport aki a bin cu recomendacionnan pa trese cambio den e sistema di pensioen di minister y parlamentarionan, cambio den e ‘overbruggingstoelage’, pues elimina privilegionan inhustifica cu politiconan a crea pa nan mes. Wel, gobierno di Aruba a duna di conoce cu nan no ta bai kita e privilegionan aki.
Asina cu Pader Lampe a drenta Parlamento el a a haci pregunta na Prome Minister, sr. Nelson Oduber, cu for di 2000, Gobierno y Parlamento a bai di acuerdo pa implementa e Rapport Fowler, y cu despues di 5 aña nada no a sosode y si e por informa RED den ki etapa e trahamento di leynan corespondiente ta.
“E pregunta mi a hasi por escrito dia 7 di november 2005. Nunca mi a haya contesta. Te awor den mi postbus mi a haya un contesta indirecto, ya cu e Memorie van Toelichting di e Landsbesluit h.a.m. cu ta den sali ta bisa: “Alhoewel de kwestie een hoge prioriteit heeft bij de regering, kan vooralsnog geen termijn worden gegeven waarbinnen de wettelijke implementatie van de aanbevelingen van de Commissie Fowler zijn beslag zal kunnen krijgen, zodat het thans niet zinvol is om een einddatum te noemen voor onderhavige bijzondere ambtelijke pensioengrondslag”.
Despues di 8 aña, Gobierno ta bisa cu ainda e no sa ki dia lo implementa Rapport Fowler, es decir gobierno no tin boluntad pa ehecuta dicho rapport. Gabinete Oduber kier sigi djodjo cu e privilegionan cu politiconan a crea pa nan mes despues cu Aruba a haya su status aparte.
PENSIOEN
Esaki ta un falta di respet tambe pa Parlamento di Aruba. Dia 4 di juli 2006 fraccion di RED a presenta un mocion cu a keda aproba unanimamente y cu ta urgi gobierno pa realiza e cambionan di ley según e recomendacionnan di Rapport Fowler y na mesun momento ta pidi pa tuma na cuenta desaroyonan recien den Reino Hulandes manera na Antias, cu a hisa e edad di pensioen di minister y parlamentarionan na 60 aña.
Kiermen Gabinete Oduber no a respeta e mocion aproba cu sosten di e mesun fraccion di MEP, cu ta sostene e gobierno. Con ta posibel cu e gobierno di MEP ta bai contra deseo di fraccion di MEP y e parlamentarionan di MEP no ta bisa nada.
E ministernan di MEP ta trapa riba e parlamentarionan di MEP y e parlamentarionan ta keda keto. Esei ta tristemente conosi como ‘stempelparlement’.
Gobierno den e concepto di Landsbesluit h.a.m. cu ta na caminda ta hasi mal uso si di e Rapport Fowler. Ta mal usa dicho rapport pa bin cu un arreglo pa e happy few di algun hefenan di departamento pa regla nan pensioen a base di schaal 16 plus 25% di toelage. Den pasado Raad van Advies a bai contra e arreglo discriminatorio aki cu a keda implementa pa algun hende so, awor atrobe Raad van Advies ta mustra cu esei no por, pero toch gobierno ta sigi fix pensioen halto pa un grupito atrobe hasiendo uso inapropia di rapport Fowler.
Nan no kier usa si e rapport Fowler pa touch e privilegionan di politiconan. Pueblo ta paga toch, pa politiconan sigi fiesta.