WILLEMSTAD/DEN HAAG - Parlamentu ulandes lo no duna su koperashon pa investigá korupshon na Antia. Un mayoria den Tweede Kamer a rechasá e petishon di partido Partij voor de Vrijheid pa un enkuesta parlamentario riba e asuntu aki.
Partidonan di koalishon CDA i PvdA, huntu ku partidonan di oposishon GroenLinks i VVD a indiká ku nan no ta sinti nesesidat p’esei.
“Si konstatá ku tin kasonan di korupshon na Antia, anto simplemente mester hasi denunsia di esaki. Un enkuesta parlamentario komo un paso meimei ta parse mi algu innesesario,” asina miembro di frakshon di CDA Bas Jan van Bochove a bisa.
Parlamentario John Leerdam di PvdA ku ta oriundo di Antia tambe a bisa ku e no ta sinti nada pa esaki. Segun Leerdam, no tin nada nobo ku a bin dilanti. “Niks nieuws onder de zon” ta loke el a bisa.
E tambe ta haña ku si tin kasonan kaminda por papia di korupshon, anto hustisia na Antia mester pèrsigui esnan kulpabel.
Leerdam a enfatisá ku e no ta sera su wowonan pa realidat, pero di otro banda mester bisa ku den último añanan a hasi hopi pa kombatí korupshon na Antia.
PVV ke kuminsá e investigashon parlamentario aki, a base di un kantidat di 170 kaso di korupshon ku e ta bisa ku su miembro Hero Brinkman konstatá na Antia.
Si otro frakshonnan den parlamentu ulandes no koperá ku e investigashon, anto esei ta nifiká ku nan tambe ta kulpabel na e situashon di korupshon na Antia, segun e frakshon di PVV.
Partido VVD a bisa ku e ta haña un enkuesta parlamentario asin’aki un bon kos, pero e ta haña ku esei ta algu ku Antia mes mester hasi.
“Si nos bai hasi esaki nos mes aki na Ulanda, nos no ta haña sa e datonan konkreto. Nos no tin sufisiente kompetensia pa esei,” asina e miembro Johan Remkes a bisa.
Ronald van Raak ta haña investigashon di korupshon na Antia un bon kos pa hasi. Pero, asina el a agregá mesora su partido – SP – ta analisando ku un enkuesta parlamentario ta e mihó instrumento pa esaki.
SP ta preferá di inkluí e kombatimentu di korupshon den e trayekto ku e islanan ta kanando awor aki pa mas independensha den Reino.
Sekretario di Estado Ank Bijleveld a bisa ku den e deliberashonnan ku e ta hibando ku Antia i e islanan pa un status estatal nobo, e ta poniendo masha atenshon riba kombatimentu di korupshon i tambe riba bon gobernashon. Segun Bijleveld, mester atendé korupshon ku man duru i esaki mester sosodé atraves di Ministerio Públiko.
El a agregá, ku ta importante pa menshoná e asuntu aki pa asina yega na un solushon. El a bisa ku e mes tambe ta menshoná e kasonan aki ora e ta na Antia.
El a referí na e hecho, ku ora ta deliberá riba status nobo i saneamentu di debe, ta papia mesora riba supervishon finansiero. Atraves di e supervishon aki, bo ta evitá tambe patronahe polítiko, segun Bijleveld.