WILLEMSTAD - Gobièrnu a tuma e desishon ku e ta destruí e nombramentu di Gerrit Schotte komo hefe di Facilitaire Zaken na servisio DROV. Esei ta loke abogado di gobièrnu a partisipá ayera durante tratamentu di e kaso den korte.
Ku esaki por bisa ku a yega un fin tambe na e disputa riba e kaso aki.
Despues ku el a baha komo kolaboradó di diputado (Charles Cooper, red) na 2007, e Bestuurscollege di e tempu ei a nombra Schotte den e funshon ya menshoná na DROV, un desishon ku a okashoná bastante desgustu, malkontentu pero tambe indignashon serka empleadonan di DROV.
E indignashon ta mas grandi ainda, si konsiderá ku ya kaba tabatin un funshonario na DROV mes, Sharine Mongen ku tabatin e promesa ku ora e persona aktual baha ku penshun, ku e lo haña e funshon ei.
Ku nombramentu di Schotte, e menasa tabat’ei ku e lo haña e funshon ei mas, motibu tambe ku el a entamá e kaso den korte.
Mester bisa, ku e kaso a dura un eternidat. Tabatin diferente seshon kaminda wes a purba haña un solushon pafó di korte, pero no a logra den esaki. Inkluso t’asina ku durante kuminsamentu di e kaso den korte, sierto momentu e abogado di gobièrnu a insistí ku no tin un nombramentu di Schotte na DROV, un anunsio ku a okashoná hopi strañesa serka tur hende. Pero, e abogado despues mester a revoká e ponensia aki, ora a sali na kla ku debidamente ta eksistí un dekreto ku ta regla nombramentu di Schotte.
Ayera abogado di gobièrnu a anunsiá ku Bestuurscollege un dia promé a tuma e desishon ku ta revoká e nombramentu di Gerrit Schotte na DROV. Esaki ta nifiká, ku a habri kaminda atrobe pa Sharine Mongen por haña e puesto di hefe di Facilitaire Zaken.
Abogado Bertie Braam jr. a ekspresá su konvikshon ku ora yega asina leu – naturalmente mester kana e proseso di solisitut ku ta kustumber den e kaso aki – su kliente lo haña e funshon tambe.
Kiko ta bai pasa den kaso di Schotte, no ta masha kla ainda.
“Esei lo bira un asuntu entre Schotte i e aktual gobièrnu. Ta na Bestuurscollege pa disidí si nan ta buska un otro funshon pa Schotte na DROV mes òf otro kaminda. Esei ta un asuntu ku ta Bestuurscollege ta disidí,” Braam jr. a indiká.
Aki un siman e dekreto ku ta konfirmá e desishon di Bestuurscollege pa revoká e nombramentu, lo ta kla. Ku tur probabilidat korte lo pone un punto final na e kaso, entre otro stipulando ku gobièrnu di Kòrsou lo mester karga e gastunan di e kaso aki.