WILLEMSTAD - Lo no tin elekshon na 2010, simplemente pasobra e pais ku yama Antia, no ta eksistí mas, asina promé minister antiano Emily de Jongh-Elhage a deklará durante enkuentro ku prensa ayera.
E reakshon aki di De Jongh-Elhage a bin despues ku lider di MAN Charles Cooper a lansa krítika fuerte riba e asuntu aki. Cooper a bisa ku ta inaseptabel ku gobièrnu por disidí riba su mes, ku no tin elekshon na aña 2010, tal manera lei ta stipulá.
Si gobièrnu no tene elekshon, MAN lo denunsiá esaki I MAN lo konsiderá pa bai korte, asina Cooper a atvertí.
Segun Charles Cooper, partidonan di koalishon no tin kurashi pa pone maneho di gobièrnu dilanti pueblo den un elekshon liber pa asina pueblo disidí si e ta haña gobernashon di último añanan aseptabel òf no.
Promé minister di Antia ayera a rechasá e ponensia aki.
El a mustra ku durante e enkuentro polítiko ku a tuma lugá na mei último, partidonan a yega na sierto palabrashon. A konkluí ku 15 di desèmber 2008 no ta alkansabel mas. Pero un di e desishonnan a tuma ta, ku e konseptonan di lei ku ta regla desmantelashon di Antia mester ta kla – mas tantu posibel – pa dia 15 di desèmber awor.
“E meta ta pa durante 2009 traspasá mas tantu tarea i outoridat posibel pa e teritorionan insular. Nos ta papiando di entidatnan nobo ku lo haña e tareanan ku awor aki Gobièrnu Sentral tin. Ki sentido tin pa bai tene elekshon pa parlamentu i pa un gobièrnu nobo, si no tin trabou mas pa e gobièrnu aki hasi?” De Jongh-Elhage a puntra.
De Jongh-Elhage a bisa ku e no ta komprondé e asuntu aki.
El a mustra ku di akuerdo ku tur eksperto, di mas tempran ku Antia por haña su status nobo ta 2011. Pero esei no ta nifiká ku nos ta bai sinta ketu. Turesten ta preparando e leinan nesesario i nos ta spera ku den 2008 nos lo por traspasá mayoria tarea pa e entidatnan nobo. En todo kaso, den kareda di 80 pa 85 porshento, segun e promé minister antiano.
“Oposishon ta reklamando konstantemente tur sorto di kos. Pero mi ke pa un hende splika mi ki sentido tin pa bo tin un gobièrnu, anto bo no tin un pais,” e hefe di gobièrnu antiano a indiká finalmente.