WILLEMSTAD - “E lei pa regla supervishon finansiero no ta un lei di Reino (Rijkswet) manera nos tin kustumber di atendé. De fakto, gobièrnu no tin obligashon di manda esaki ni pa Konseho Insular, ni pa Staten. Pero komo ku nos a palabra esei den reunion ku Ulanda, mi ta hasié tòg,” asina lider di gobièrnu antiano Emily de Jongh-Elhage a deklará.
Awe parlamentu antiano mester atendé e asuntu aki.
Tantu frakshon di MAN i frakshon di Forsa Kòrsou, tin masha problema ku e forma ku a atendé tratamentu di e lei aki.
Nan ta mustra ku e lei ku gobièrnu ke introdusí pa regla supervishon finansiero pa Kòrsou i Antia ta un lei di vital importansia.
“Nos ta papiando aki di un lei importante i pa bo kana e proseso di un lei asin’aki, bo mester tin por lo ménos e konsehonan nesesario, manera esun di Raad van Advies. Anto te asina leu ku nos por a averiguá, ni sikiera a pidi e konseho aki ainda,” asina Eunice Eisden, miembro di MAN a denunsiá.
E reunion di awe ta riba petishon di partidonan di koalishon pa fiha posishon di Staten riba e lei ku mester regla funshonamentu di e Kolegio pa Supervishon Finansiero. Awor aki ta den rekta final ku aprobashon di e lei aki. Unabes e lei ta na lugá, Ulanda por kuminsá ehersé kòntròl riba maneho finansiero di Kòrsou, St. Maarten i Antia.
Esaki alabes ta kondishon pa kuminsá ku e proseso di saneamentu di debe di nos pais.
Di akuerdo ku Gobièrnu Sentral den su karta pa parlamentu, ta e intenshon pa trata e proposishon di lei aki den Konseho di Minister di Reino dia 11 di yüli benidero.
Tantu frakshon di MAN komo di Forsa Kòrsou a bisa ku nan no ta komprondé pakiko tin asina tantu purá pa pasa e lei aki. Nos ta papiando aki di un lei ku tin konsekuensianan grandi pa pais, anto un lei asin’aki bo mester studi’é bon promé i bo mester tin tur e konsehonan relevante riba mesa promé, segun e frakshonnan ta trese dilanti.
Anteriormente presidente di parlamentu Pedro Atacho a splika, ku el a haña petishon di e partidonan di koalishon pa tene e reunion. Konsiderando ku otro siman un delegashon parlamentario ta biaha pa Ulanda pa partisipá na e enkuentro parlamentario POK, Atacho a konsiderá nesesario – tambe mirando e fecha di 11 di yüli – pa trata e lei e siman aki.
Promé minister Emily de Jongh-Elhage a pone masha énfasis riba e hecho ku gobièrnu no tabatin e obligashon pa manda e proyekto di lei aki pa ningun di de kolegionan legislativo di Antia.
“Den e reunion na Marriott Hotel resientemente ami ta esun ku a para’riba ku mi ke tende opinion di tantu Konseho Insular di St. Maarten, di Kòrsou i di parlamentu di Antia. Esei ta loke ami a para ‘riba pa sosodé. Pero e no ta un obligashon, pasobra nos no ta papiando di un lei di Reino,” e promé minister a indiká finalmente.