WASHINGTON, Merka, - E kandidato demókrata pa presidensia di Merka, Barack Obama, a aseptá renunsia di e hefe di ekipo di tres persona nombrá siman pasá pa buska e “running-mate” (vise presidente) ku lo kompañ’é den su karera pa Kas Blanku.
E nòmber di Jim Johnson, eks presidente di e empresa hipotekario semi-estatal Fannie Mae, den último simannan a aparesé involukrá den un skandal, relashoná ku algun préstamo dudoso ku el a risibí di e empresa Countrywide Financial.
Jim Johnson, kende tambe a dirigí e búskeda di vise presidente pa e senador demókrata John Kerry den e elekshonnan ku el a pèrdè na 2004, a disidí bandoná su puesto, pa evitá ku e polémika den kua e ta involukrá lo por afektá e mishon ku e senador pretu a asign’é.
“Jim no tabata ke distraé atenshon den e importante tarea di buska informashon riba mi kandidato pa vise presidente, i p’esei el a tuma e desishon di retirá, i mi a asept’é”, un komunikado emití pa ofisina elektoral di Obama na Chicago a bisa.
Clinton ta sperando kontesta
Miéntras tantu, ainda hopi hende ta puntra si Hillary Clinton lo bai forma parti di e asina yamá “Dream ticket” huntu ku Obama.
Esaki ta algu ku a keda spekulá ku fòrsa den filanan demókrata, despues ku e dama senador pa New York a aseptá su derota den e elekshonnan primario i a ofresé su mes pa okupá e kargo di number dos di Obama.
E senador afroamerikano te ainda no a bisa nada relashoná ku esaki, pero si el a sa di elogiá su rival antiguo.
Ademas e dos polítikonan aki algun dia pasá a tene un enkuentro na New York, loke a krea rumornan, mirá ku bon wowo pa algun estratega di e partido, kendenan ta pensa ku solamente di e manera aki e herida habrí lo por kura, despues di sinku luna di bataya elektoral.
Apart di Hillary Clinton, e lista di posibel vise presidente ta largu.
E eks kandidato presidensial John Edwards tin influensia i a surgi ku fòrsa despues ku el a anunsiá públikamente su apoyo pa Obama.
Tambe a hasi menshon di e siguiente personanan aki: Bill Nelson, senador pa Florida fo’i 2001; Chris Dodd, kende ta eksperto den Amérika Latina ku ta papia spañó di un forma ekselente; i Joseph Biden, kende ta presidente di Komité di Senado den Relashonnan Eksterior.

Foto: Jim Johnson 1206

Jim Johnson, eks presidente di e empresa hipotekario semi-estatal Fannie Mae.

Foto; Barack Obama 1206

Barack Obama: “Jim Johnson a tuma e desishon p’e retirá, i mi a asept’é”.

Foto: Hillary Clinton 1206

Hillary Clinton ta sperando kontesta p’e forma parti di e asina yamá “Dream ticket” huntu ku Barack Obama.