WILLEMSTAD – Vereniging Protestant Christelijk Onderwijs (VPCO) a lansa un alarma grandi ayera, indikando ku mas ku 300 mucha lo sali perhudiká pasobra nan no por sigui enseñansa HAVO/VWO den e próksimo aña eskolar. E organisashon a tene un konferensha di prensa ayera pa señalá vários aspekto ku no ta bayendo den bon direkshon pa ku e maneho di enseñansa di e gobièrnu.
Segun direktiva di VPCO, danki na e maneho di Gobièrnu di Kòrsou kada aña tin un gran kantidat di mucha di kua ta kita nan derecho di bai un skol HAVO/VWO. Te ku awor tin únikamente lugá pa 18% di e mihó studiantenan di grupo 8 na e skolnan HAVO/ VWO eksistente. For di dia ku e Deltaplan a keda firmá e punto di salida ta, ku tur mucha di grupo 8 na skolnan básiko i di fundeshi tin derechi di pasa pa HAVO/VWO basta nan tin un rapòrt ku un promedio di 7. Esaki ta 25% pa 30% di e kantidat total di alumnonan. E kresementu aki di kasi 300 mucha ku tin derecho pa haña nan formashon na un skol HAVO/VWO, no por keda akapará pa skolnan eksistente. “Pues ta nos yunan ta bira víktima di e situashon aki.”
Vereniging Protestant Christelijk Onderwijs (VPCO) a señalá e kresementu aki pa añanan largu i ta bringa for di 1997 pa supsidio di un propio HAVO/VWO. Gobièrnu di Kòrsou no ke finansiá esaki ni ke rekonosé. Esaki no opstante e echo ku esaki práktikamente no tin konsekuensia finansiero adishonal pa presupuesto di gobièrnu. Pió ainda e kostonan promedio di un studiante na un HAVO/VWO, konforme e norma pa kubri di sistema “V&V “, ta mas abou ku pa un studiante ku ta sigui enseñansa pa fishi. Kasi 60% di VPCO su alumnonan ta sigui pa HAVO/VWO. Ku esaki VPCO ta entregá e porsentahe mas haltu di alumnonan na skolnan HAVO/VWO pero no mag di ofresé su propio edukashon HAVO/VWO.
Tin sufisiente indikashon ku na e skolnan HAVO/VWO aktual no tin sufisiente kupo pa tur e muchanan ku tin derecho di bai HAVO/VWO. VPCO ta premirá ku den ougùstùs próksimo lo tin un kantidat di 300 mucha ku lo no por haña un lugá na un skol HAVO/VWO. Debí na e situashon aki mayornan ku si tin e forma di paga algu mas ta haña nan mes obligá pa pone nan yunan na skolnan partikular.
VPCO a kuminsá na ougùstùs 2007 na Marnix College ku un komunidat di skol ku un departamentu di HAVO/VWO. Gobernador di Antia, Minister di Enseñansa i wes den LAR a rekonosé e nesesidat i e derecho di VPCO pa tin su propio skol HAVO/VWO.
Na opinion di VPCO e situashon aki no por perdurá. “Ta nos muchanan ta bira víktima di e maneho aki ku no te tene kuenta ku e nesesidat den nos komunidat ni e derecho riba edukashon apropiá ku e mucha tin”.
Si Bestuurscollege no tuma akshon i krea un kuadro den kua e Deltaplan por keda realisá, anto ougùstùs próksimo un grupo grandi di mucha, bou di kua nèt esnan ku ta prometé mas pa nos futuro, por keda ranka di nan derecho pa sigui formashon na un skol HAVO/VWO, asina direktiva di VPCO a bisa.