WILLEMSTAD - Fakultat Sosial Ekonómiko di Universidat Nashonal di Antia (UNA) a koperá na e investigashon pa promoshon di Arnoud van der Maas ku a defendé su tésis dia 9 di mei na Rotterdam School of Management, ku ta liá na Erasmus Universiteit. E tésis ta titulá: Strategy Implementation in a Small Island Context: An Integrative Framework i tabatin Kòrsou komo region di investigashon.
Den e investigashon ta kontestá e pregunta kua faktornan ta influensiá e éksito si òf no di implementashon di plannan stratégiko den e konteksto no Wèst.
Dr. Ing. Gilbert Cijntje RI, lektor na Fakultat Sosial Ekonómiko di UNA, tabata e ko-promotor i Roy Evers, direktor di Curaçao Institute for Social and Economic Studies (Curises), tabata e inisiadó.
“Den último 10 añanan nunka no a sosodé ku UNA a fungi komo ko-promotor na un disertashon”, asina Cijntje ta bisa. “E tabata un reto i un honor grandi pa partisipá na un proyekto asin’aki. ” E promotor mes tabata prof.dr. H.G. van Dissel.
E investigashon ta inovativo, pa motibu ku ya kaba a hasi hopi investigashon na formulashon di plannan stratégiko, pero no na implementashon di e plannan aki i e eventual éksito òf fayo. Lokual tambe ta úniko ta, ku e investigashon a tuma lugá den e konteksto no-Wèst, manera paisnan den desaroyo ekonómiko i ekonomianan chikitu. Por último, e investigashon tabata partikular, pasobra e ta multi disiplinario i ta deskribí diferente área di management, pero tambe estudionan riba tereno di desaroyo i islanan.
Den e investigashon ta konstatá, ku implementashon di plannan stratégiko ta tuma lugá den un sierto konteksto, unda diferente faktor ta hunga un ròl. E implementashon ta pasa dor di diferente fase tambe. Den henter e proseso aki kosnan por bai robes. Un ke otro ta dependé di e konosementu den e organisashon, e konteksto polítiko, e plan di implementashon, e struktura di e organisashon i e kultura di e organisashon.
Ta sali afó, ku faktornan sosial ta hunga un papel grandi den e éksito di implementashon di plannan stratégiko den ekonomianan no-Wèst, manera esun di Kòrsou. Por ehèmpel e konteksto históriko, retnan familiar, relashonnan personal i patronahe polítiko.
Arnoud Anthony van der Maas (1972) ta kuminsá su estudio di Ekonomia na aña 1992 na Erasmus Universiteit Rotterdam. Despues di dos aña e ta pasa pa e estudio Business Administration na mesun universidat. Na 2001 Van der Maas ta optené si grado di Masters den Strategic Management/International Business. Despues di esaki e ta kandidato Ph. D. na e sekshon di Decision and Information Sciences di Rotterdamse School of Management (RSM), liá na Erasmus Universiteit.