WILLEMSTAD – Diferente mayor a reakshoná masha furioso riba e eksigensia di gobièrnu di Kòrsou ku muchanan no por bai ku fakansi promé ku skol sera dia 27 di yüni awor. Si tin mayor ta insistí ku nan yunan por bai ku fakansi, nan por pidi un dispensashon na Servisio di Asuntunan di Enseñansa (SAE). SAE a haña diferente petishon kaba den e último dianan pa un dispensashon. E aña aki ainda ta un poko fleksibel ku aplikashon di e regla aki pero einan mes por mira ku el a krea inkomodidat pa diferente famia ku ke bai ku fakansi for di awor. Imigrashon a haña òrdu pa no laga niun mucha pasa ku ta entre 4 i 18 aña a ménos ku tin motibu bálido òf un dispensashon.
Algun mayor a alegá ku miéntras ku gobièrnu ta bisa ku muchanan entre 4 i 18 aña mester ta na skol, ya kaba algun skol a sera. Un di nan ta por ehèmpel International School ku ya kaba a sera. Mayornan awor ta na kareda pa haña dispensashon pa nan sali ku nan yunan for di Kòrsou. Na otro skolnan tambe tin e situashon partikular ku ya kaba diferente klas a sera despues di e proefwerknan final. Mayornan di e muchanan aki tampoko por bai ku fakansi si nan no haña dispensashon. Di otro banda sinembargo gobièrnu no a sòru pa e skolnan keda habrí te dia 27 di yüni awor. Basta reklamá nos a haña riba e situashon ku a presentá i ku a pone diferente mayor na kareda. Algun di nan ya kaba a hasi e gastunan korespondiente i awor mester kana e kaminda pa bai skol buska firma i bai SAE pa haña un dispensashon.
Un di e mayornan ku mester bai Ulanda e fin di siman aki a bisa ku e no tabata sa mes di e situashon i ta ayera numa el a tuma nota di e kaso. E ta bayendo Ulanda pa sorpresá un miembro di famia ku ta hasi aña i ta kla ku tur trámite. Awe i mañan e lo bai trata di haña dispensashon pa su yunan. Un otro mayor a bisa ku e skol a sera kaba i e mester a yama e direktor na su kas. E direktor sinembargo a sòru pa un formulario “standard” na sekretariado di e skol ku tur mayor por usa. Asina tin diferente ehèmpel mas di e situashon aki ku sigur no a yuda diferente famia.
Ta bon pa bisa for di awor aki ku pa otro aña lo apliká e medida den forma mas rígido. Diferente mayor a bisa ku nan no tin problema ku esei basta ku Gobièrnu asumí su responsabilidat i sòru pa skol ta habrí tambe te e periodo ku fakansi kuminsá.