WILLEMSTAD – E kompania di telefòn lokal UTS a informá awe, ku e no a haña indikashon di sabotahe na e kompania, relashoná ku e black-out ku tabatin siman pasá. Sinembargo, tres empleado di e kompania ta riba “non aktief” pendiente di e investigashon aki. E black-out di telefòn a kue tur hende di sorpresa djarason siman pasá i a okashoná un daño grandi pa ekonomia di Kòrsou. Mesora e kompania a anunsiá un investigashon tékniko independiente meimei di vershonnan insistente ku por ta trata aki di un kaso di sabotahe.
E kompania a informá awe mainta ofisialmente, ku investigashonnan ta kanando relashoná ku e problema ku a surgi den e sistema di koriente na Sentral di Steenrijk siman pasá, 4 di yüni, kual a kousa interupshon den vários servisio di UTS. “Na momentu ku e problema aki a surgi, UTS mesora a konsentrá pa resolvé e problema mas pronto posibel. Seguidamente investigashonnan a start pa sa e kousa di e problema aki. UTS a pone tres empleado ku ta direktamente responsabel pa sistema di koriente riba ‘non aktief’ pa nan mes protekshon i tambe p’asina e investigashonnan aki por kana di un manera ophetivo.
UTS ta hasiendo uso di un kompania independiente pa hasi e investigashonnan aki. Esaki ta andando, pero ainda no tin un resultado konkreto. Sí por bisa, ku te na e momentunan aki no tin ningun indikashon ku ta trata di un sabotahe”, asina e kompania ta bisa.
E kompania a sigurá, ku e lo suministrá mas informashon tokante e investigashon, na momentu ku esaki bira disponibel.
Informashonnan adishonal ku LA PRENSA a haña di e kaso ta indiká, ku ta konsentrando tambe riba e posibilidat di negligensia den e kaso aki. Segun nos informantenan, a oumentá e kapasidat di Steenrijk, pero no a oumentá e kapasidat di e “back-up” di koriente na momentu ku a ekspandé e kapasidat. Pa kolmo, e sistema di bateria di back-up no tabata kargá sufisientemente pa resisti e impakto di falta di koriente ku a konstatá. E punto aki ta krusial den e investigashonnan ku ta tumando lugá awor aki i ku ta na enkargo di un entidat independiente.