WILLEMSTAD – Leinan sivil di nos paisnan ta bisa, ku asina un persona hasi deklarashonnan ku por ta ofensivo pa un otro persona i asta por kondusí na daña su bon nòmber i integridat, ta algu kastigabel pa lei. I aparte ku e persona en kuestion por hasi un keho na Ministerio Públiko a base di e asina yamá “Lastersmaadschrift” pa ofensa ku ta hasi ku e por kuminsá ku un proseso sivil pa obligá esun kulpabel na difamashon pa rektifiká públikamente e loke a keda tresé dilanti.
Esaki tabata e promé deklarashonnan di abogado Gelmer Pieter na LA PRENSA.
Den un entrevista telefóniko ku abogado Pieter, el a splika LA PRENSA, ku na momentu ku tin un deklarashon ofensivo i e keda publiká, e ta bira aun mas kondenabel, na momentu ku e kontenido no ta basa riba realidat, asta ku den sierto kasonan kaminda e kontenido lo por tin algu di bèrdat den dje. Abogado Pieter ta sigui informá LA PRENSA, ku un wes imparsial lo tin ku husga, ku si tabata nesesario pa a publiká e relato en kuestion ku mas ainda e wes lo bai husga ku e intenshon pa publiká e relato tabata unu ofensivo pa e persona ku hasi e demanda.
Abogado Gelmer Pieter ta indiká, ku den kaso di Hero Brinkman lo bai tin indudablemente diferente reakshon kontra di su publikashonnan i ku e chèns ta grandi den un òf mas di e personanan ku aparesé riba e lista di Brinkman lo hib’é korte. Esaki sigur na momentu ku Brinkman ninga di rektifiká e deklarashon ofensivo hasí. Mas aleu mester mira, ku for di e punto di bista basá di loke a keda publiká, di tin tur indikashon ku Brinkman a aktua konforme di informashon digital ku a yega na su persona.
Por kere, ku Brinkman no a hasi niun sorto di investigashon ni tabata dispuesto pa hasi esaki promé ku a konkluí su akto. Abogado Gelmer Pieter ta mustra, ku ta insólito pa un persona, kua sea su posishon ku e ta okupá manera esun di Brinkman, ta subi un trono i pensa di asumí un posishon den outoridat i kere di por ofendé henter e pueblo. Finalmente abogado Gelmer Pieter ta deklará, ku na su opinion e asuntu aki ta inaseptabel. Por a komprondé ku e bufete di e abogado aki a kaba di haña un kaso di personanan ku nan nòmber ta aparesé riba e lista pa buska rektifikashon.