WILLEMSTAD – Kòrsou mester di un lei ku ta regulá kapmentu di palu. Esaki ta e úniko manera pa evitá ku palunan balioso pa nos naturalesa i medio ambiente ta bai pèrdí. E atvertensia akí ta bin di Amigu di Tera ku a bolbe konstatá kapmentu di palu kantu di kaminda na San Sebastian.
E último kaso akí di kapmentu di palu kantu di kaminda, a kosta palunan bunita di Sia i Shimaruku ku tabatin hopi edat kaba. Amigu di Tera ta lamentá esaki i ta bisa ku aparentemente no ta planifiká trabounan kantu di kaminda na drechi, promé ku kuminsá koba pa pone kabel òf tubu. LA PRENSA a kòmbersá ku Lloyd Narain i el a splika ku tur kontratista mester pidi un pèrmit pa koba promé ku nan kuminsá ku nan trabounan. “Sin embargo si D.O.W., ku ta otorgá e pèrmit, no pone stipulá ku kontratista mester tene kuenta ku e vegetashon, e kontratista por bisa ku e no a haña niun informashon di gobièrnu ku ta prohibí kapmentu di palunan riba e parti kaminda mester a koba. Segun mi no tin un lei tampoko ku ta bisa ku D.O.W. mester pone e kondishonnan den e pèrmit pa koba ku e kontratista ta haña.”
Narain a splika ku ora ta trata tereno di gobièrnu no tin mag di mishi ku nada. Pero tòg no tin kòntròl di D.O.W. ta tuma lugá. “Tin un progreso slo na Kòrsou kaminda tin kontratista ku ta drecha tur kos ora nan kaba di koba, pero lástimamente nan no ta tene kuenta ku naturalesa. Mi a yega di yama un kontratista ku tabata trahando den un área na Kòrsou, ora ma nota ku e trahadónan tabata benta e sobrá di material di konstrukshon den un pida abismo. E abismo tabata un área di konservashon i un pida naturalesa masha bunita. Ma bisa e shèf di e kontratista pa e instruí e trahadónan, loke el a garantisá mi di lo hasi. Tòg nan a keda basha tur e sobrá di e material di konstrukshon den e abismo konservá. I niun hende ta responsabel pa esaki.”
Pa loke ta trata kapmentu di palu den kurá di kas, Narain a bisa ku lástimamente ku un doño di kas por kap tur palu den su kurá sin ku esaki tin konsekuensia p’e. “LVV tabata preparando un ‘kapwet’ 20 aña pasá ora nos organisashon a kaba di lanta. Nunka mas esaki a kristalisá. Kòrsou mester di un lei ku ta regulá kapmentu di palu. Ora un hende tin un palu grandi den su kurá i e ta bira un peliger, e lo mester buska un pèrmit serka D.O.W. Seguidamente un hende di e servisio mester bai wak e situashon i duna un konseho. Por asta mara e kapmentu di un palu den un kurá, ku plantamentu di un otro palu den e kurá òf na un otro sitio na Kòrsou. E doño di kas ku a kap e palu por duna un kontribushon pa planta un otro palu”, Narain a splika.
Finalmente Narain a splika ku boluntat di gobernashon ta hasi falta na Kòrsou, ora ta trata nos naturalesa i medio ambiente. “Tur aña di nobo bo ta mira algun polítiko yen ‘fanfare’ ta planta dos tres palu dia riba Dia di Plantamentu. Loke nan mester hasi ta stòp e plantamentu akí i sòru ku dia tin ku rekordá e fecha próksimamente, tin e lei di kap kla reglá.”