BERNA, Suiza – Ulanda a kobra un víktima mas ku no tabata den e plannan ora el a golia Fransia 4-1 i mesora el a drenta kuart final di Eurokopa 2008.
E delanteronan Dirk Kuy, Robin van Persie, Arjen Robben i Wesley Sneijder a hinka e golnan na di 9, 59, 72 i 90 minüt den stadion Suisse den wega di Grupo C.
Thierry Henry a deskontá pa Fransia na di 71 minüt.
Ulanda ku den su debut a bati e kampion mundial Italia 3-0, a yega seis punto i a pasa pa e siguiente buèlta kaminda e tin ku topa e no. 2 di Grupo D (kaminda tin Spaña, Suesia, Gresia i Rusia).
Rumania ku mainta a tabla 1-1 ku Italia ta na di dos puesto ku 2 punto.
Grupo C ta sigui djamars 17 ku Fransia vs Italia i Ulanda vs Rumania.
Fransia ku Italia kada un tin un punto.
E último bia ku Les Bleus a keda for di kompetensia den promé rònt tabata na 1992, bou di direkshon di Michel Platini.
Ora ku e tim oraño tabata akomodando su mes for di un tiru di skina, Kuyt a pasa dilanti Florent Malouda i a hinka ku kabes.
Ulanda a usa e mesun fórmula ku el a apliká kontra Italia: toka e bala promé, hunga bala sigur i un kuarteto – Kuyt, Wesley Sneijder, Rafael van der Vaart i e goliadó Ruud van Nistelrooy – ku por ta mortal si duna nan espasio.
Un biaha mas ku su goliadó históriko Thierry Henry, rekuperá di un leshon di múskulo ku no a permitié hunga den e empate 0-0 kontra Rumania, Fransia a kambia su sistema pa unu mas flèksibel 4-2-3-1, ku kua su treiner Raymond Domenech parse a skucha e súplikanan di si hungadónan pa un wega mas ofensivo i no asina pragmátiko.
Ounke nan a tarda pa komodá nan mes i sinti e gòlpi, Les Bleus tabatin den e promé mitar mas yegada ku den henter e wega kontra Rumania.
Sydney Govou a aserká ku peliger na di 22. Un Franck Ribery hopi mas aktivo i doño di kada atake di su ekipo. Fransia a kuminsá pusha Ulanda den su mitar tereno i tabata e mesun delantero di Bayern Munich ku a sali na kareda, drenta e aria rival i a lòs un tiru ku kiper Van der Sar a para na di 34.
Ora Ulanda tabata sinti ku e situashon ta birando poko difísil, e treiner Marco van Basten a manda dos puntero den wega, Arjen Robben i van Persie, tur dos regular normalmente, pero riba banki komo ku nan no ta den kondishon tòp. Nan dos a kontribuí na e di dos gol.
Despues di un pase presis di Willy Sagnol, Henry a hinka e gol di deskuento i su di 45 gol ku e selekshon franses.
Pero den e siguiente hugada Robben a superá e defensa i kapitan Lilian Thuram i el a lòs un pia robes ku a pasa mané welek riba kabes dje kiper Gregory Coupet.
Sneijder a sera e fiesta ku un tiru di distansia medio pa e 4-1.