WASHINGTON, Merka, - E periodista merikano, Tim Russert, a muri ayera di un atake di kurason n’e edat di 58 aña, miéntras e tabata prepará e programa “Meet the Press” inisiá komo animadó di e programa aki fo’i 1991 na NBC, e televishon a anunsiá.
Russert a kòlèps i muri ayera tardi, miéntras e tabata trahando den su ofisina na Washington, e veterano lokutor di NBC, Tom Brokaw, a bisa.
“E tabata un di e mihó periodistanan polítiko i un di e mihó analistanan di su époka”, Brokaw a agregá.
Russert aktualmente tabata hefe di koresponsalia di NBC na Washington, i un di e periodistanan polítiko mas konosí na Merka.
Segun semanario Time, Russert tabata un di 100 persona mas influyente di mundu.
Morto di e animadó estrea di NBC a kai mané bòm pa tur lider polítiko prinsipal merikano.
E presidente di Merka George W. Bush a bisa ku Russert tabata “un institushon den mundu di informashon i polítika”.
E kandidato presidensial republikano John McCain a deklará ku Russert tabata simplemente un tipo formidabel, i su atversario demókrata Barack Obama a sigurá ku no tin mihó entrevistadó na televishon.
“Meet the Press” ta e programa periodístiko di djadumingu di mayó rating di televishon na Merka, transmití for di 1947, siendo e programa mas antiguo di televishon di e pais aki.
E programa ta inkluí entrevistanan i análisis riba informashon polítiko ekonómiko i internashonal di siman transkurí.
Tim Russert presisamente tabata grabando partinan di e programa di djadumingu benidero, ora el a sufri atake di kurason, segun NBC.
El a kaba di regresá di un biahe na Italia ku su famia, pa selebrá e resiente graduashon di su yu hòmber Luke.
Ademas di dirigí e koresponsalia na Washington i animá e programa, Russert tabata vise presidente di NBC News.
“E departamento di notisia aki lo no bai ta meskos sin su bos fuerte i kla”, Brokaw a señalá.
Tim Russert a nase na Buffalo (New York) 7 di mei 1950.
El a gradua komo abogado despues di estudionan na John Carroll University i skol di lei Cleveland-Marshall.
Despues el a drenta polítika trahando pa e demókrata Daniel Patrick Moynihan i na 1982 den ekipo di kampaña di Mario Cuomo pa e kargo di gobernador di Estado di New York.
NBC a kontrat’é na 1984 i e aña siguiente el a logra partisipashon di Papa Juan Pablo II den un programa di televishon, realisá sin presedentenan na Merka.
Den añanan siguiente, el a animá programanan for di eksterior, inkluyendo Amérika Latina, China i Australia, promé ku el a pasa pa “Meet the Press” na 1991.
Na 2005 el a gana premio “Emmy” pa su kobertura di e funeralnan di presidente merikano Ronald Reagan.
Russert a skibi dos buki “Big Russ i ami” (2004) i “Sabiduria di nos mayornan” (2006).
Ámbos publikashon na nan momentu a figurá riba lista di buki mas bendé.

Foto; Tom Russert 1406

Tim Russert riba pòtrèt di archivo 31 di mei 2008.

Foto: Bill Clinton i Tim Russert 1406

Pòtrèt emití pa NBC 30 di sèptèmber 2007 por mira Tim Russert, man drechi, durante entrevista ta sinta skucha eks presidente merikano Bill Clinton den e programa “Meet The Press”.

Foto; Tim Russert i esposa Maureen Orth 1406

Tim Russert riba pòtrèt di archivo 14 di novèmber 2007 huntu ku su esposa Maureen Orth na Washington.