Skina di Sorti, awe djasabra 14 di yüni di 2008, ta kuminsá ku deseá tur hende un bon dia. Un hende ku ta akshoná den direkshon di un meta, regularmente ta puntra su mes unda e ta den kuadro di e avanse ku e ke realisá na kaminda pa su meta. Un oportunista ta akshoná segun e situashon di momentu i ta wak e benefisio di momentu. Un reakshonario, de facto ta un persona defensivo ku ta akshoná pa konservá lokual e tin. Un konformista tin ménos ambishon ainda. E ta adaptá na e situashon di momentu.
****
Komo pais, nos no ta progresá komo ku e akshonamentu ta mustra reakshonario, hopi oportunista i ante retonan konformista. E disposishon mental pa realmente alsa nivel ta ousente. Strategia ta un kestion di trasa kaminda pa alkansá un meta. Historia den asuntu di strategia tin ménos relevansia kompará ku e meta i ophetivonan. E úniko relevansia ku historia tin ta sinta den e lèsnan ku tin di saka. Pero si bo no tin momentunan di evaluashon, bo no ta siña nada.
****
Presente su relevansia ta komo punto di salida i spesífikamente e balor ku e rekursonan di momento tin pa konbertí nan den instrumento pa alkansá meta i ophetivonan. Pero si bo no ta analisá bo situashon ku futuro den mente, bo no sa kual ta e balor di lokual bo tin. E situashon finansiero di pais ta pushando dirigentenan den sierto direkshon i pa falta di un propio plan stratégiko, rekursonan propio no ta wòrdu mira den kuadro di e papel ku nan lo por hunga.
****
Ku firmamentu di e akuerdo di transishon, irespekto kiko kada ken su pensamentu riba e kontenido ta, Kòrsou a drenta un fase nobo. Ta bèrdat ku no tin masha espasio mas pa retrosedé, sin pèrdè mas ku lo bo a pèrdè kaba. Pero sin reflekshon i reposishonamentu, ta pèrdè mas i mas en bes di gana algu. Preshoná pa e situashon finansiero, ta akshoná den forma ku ta gubernamentalmente (“bestuurlijk”) robes. Mi tin basta dia ta mustra ku ta aktua kontra di reglanan di bon gobernashon i ta atentá kontra di integridat di e sistema di gobernashon demokrátiko.
****
Akshon gubernamental i proseder di representantenan di un pueblo mester por wanta lokual nan ta yama “de toets der kritiek”. E manera di pensa di diferente integrante polítiko ta angustioso (“eng door bekrompenheid”) i ta refleho di un kalidat pober di nos interpretashon di e sistema di gobernashon demokrátiko. Pa buena marcha mi ke pone bon kla, ku tin un grupo, por sierto demasiado chikitu, ku no tin ningun problema pa duna kuenta i rason i ta konsiente ku un funshon públiko ta trese limitashon kuné.
****
Oposishon kontrali na lokual algun miembro di koalishon ta trata di pretendé tin diferente punto válido ta mobilisá riba dje. Desishon enbèrdat ta un kestion di e mayoria, pero den e sistema di gobernashon demokrátiko e mayoria ta tene debido kuenta ku e posishon di e minoria. Sigur ora ta trata asuntunan di transedental importansia.
****
Un minoria a base di resultado elektoral ta un base pa lokual ta trata asuntunan rutinario i sigur esnan ku a keda akordá den programa di gobernashon. Pero den un demokrasia bibu, esun partisipativo, asuntunan ku no ta forma parti dje grupo menshoná, ta eksigí un aserkamentu otro. Aki “het debat” ta un instrumento esensial. Mi ta ripití ku e sistema demokrátiko no ta kestion di kende tin rason, pero ta kestion di “maatschappelijk draagvlak”.
****
Nos polítikonan ta okupá nan mes demasiado ku kuestioná e echo ku un otro ta hasi uso di su derechonan fundamental en bes di okupá nan mes ku e kontenido di lokual ta na órden. Ta p’esei tambe nos nivel mental, apesar di atvertensia for di diferente skina, a bai di malu pa peor. Ta di lamentá ku polítikonan en general ta piki e ingredientenan di e situashon for di kual nan ta kere di saka djus polítiko i no ta okupá nan mes ku “The State of the Union” i posibel pasonan pa hiba pais na un nivel mas haltu.
****
Ayera mi a skirbi ku mi ta bini bèk riba e parti aki di e relato di vise presidente di Raad van State: "Democratie is meer dan democratie via staatsinstellingen. Ook op andere wijze dan via verkiezingen moeten burgers zich bij de publieke zaak betrokken weten en zich daarvoor verantwoordelijk voelen. De legitimatie van de staat hangt ook af van de wijze waarop wordt omgegaan met maatschappelijke instituties. Een hernieuwd doordenken van plaats en betekenis van onze maatschappelijke instituties is nodig."
****
Ulandesnan a amplia e proseso di debate kaminda te hasta e proseso di formashon a bai mas leu ku esnan ku ta bai forma e koalishon. Nan a amplia e proseso di formulashon di maneho, duna kuenta i rason i ahustá maneho ku “voorjaarsnota en najaarsnota”. Nan a instalá komishon ku ta vigilá gastunan grandi. Nan tin konsulta i akuerdonan entre partnernan sosial den forma struktural. Nan ta bai mas leu ku e institutonan konvenshonal.
****
Den otro forma ku no ta elekshon, ta involukrá gruponan den komunidat den e proseso di gobernashon. E sistema di gobernashon demokrátiko ta evolushoná. Serka nos tempu ta mustrando ku en bes di evolushoná, e sistema ta degradando. Ta bai elekshon pa despues yega na gobernashon di tendensia despótiko. Mi ta konstatá algu doloroso pero no ménos sierto.
****
Ta kubri demasiado aspektonan di defisiensia den nos kultura di gobernashon. No ta algu spesífiko di e gobièrnu di turno, pero un malestar di e práktika polítiko ku ta trèk tur gobernante di turno bai kuné den un kustumber maligno di arogansia ante esnan ku legitimidat pa kuestioná ehekutivonan i representashon di pueblo. En bes di atendé ku esensia ta mustra iritashon ku tin krítika i den kaso di por ehèmpel Defensor di Pueblo, un investigashon pa wak si integridat di gobernashon ta wòrdu violá.
****
Kiko a hasi ku e ponensia serio di Kontrolaria General enkuanto e nivel pober di “beleidsvoorbereiding”? Ta un realidat ku nos ta okupá nos mes ku pagamentu di kandela i adaptashon di un maneho anterior en bes di ta okupá nos mes ku hiba pais na un determinado nivel.
Bo no por planifiká sin ku bo sa ta unda bo ta pará i ta na unda bo ke bai.
****
Bo tin di deskribí bo posishon aktual, e rekursonan ku bo tin na bo disposishon, unda bo ke bai i den kual instrumento bo tin di konvertí e rekursonan aktual pa nan tin utilidat den e akshon ku bo tin di enkaminá pa alkansá bo meta. No tin otro manera di maneho. Lokual bo por hasi naturalmente ta di tira pará òf sinta wak kiko ta pasa. Pero eseinan no ta forma di manehá, nan ta opshon filosófiko, esta manera alternativa di mira bida.
****
Ta un tehi pa tende polítiko ta reakshoná konstantemente riba ponensia di otro i spesífikamente riba aspektonan kosmétiko pa tacha otro su reputashon. Pa elevá nos nivel di gobernashon, nos mester di mas polítiko ku tin un kontribushon signifikante riba problemanan real di pais. Ta riba esei partidonan tin di distinguí nan mes for di otro.
****
E “gekakel” konstantemente riba lokual otro a bisa tin e mayoria di hende fadá. Bin splika ta kon abo ta kere por atendé ku e situashon general di pais. Unda bo ta pone prioridat, kiko esei ta nifiká pa e direkshon ku pais lo bai kue. Kual ta e sakrifisionan i kual ta e benefishinan. Presentá un opshon di gobernashon.
****
Ta e ora ei nos tambe ta haña debatenan ku tin sentido. Ta e ora ei nos tambe por yega na “voorjaarsnota” i “najaarsnota” ku por sirbi komo dokumento di referensia den komunikashon riba asuntunan di maneho ku kualke entidat i pais.
****
Skina di Sorti ta ripití ku nos meta ta di fomentá un desaroyo di pensamentu krítiko den komunidat i komo tal nos no ta pro ni kontra persona, pero ta sostené òf rechasá desaroyo, posishon i desishon. Te otro mañan ku poder di Dios. Kòrda ku bo kontribushon dirigí na Skinalaprensa53@hotmail.com ta bon biní.