WILLEMSTAD – E aña aki e Kareda di Schottegat ta selebrá 30 aña.
Djadumingu awor e kareda ta sali for Stadhuis Punda tantu pa koredó komo esnan ku ta kana mitar di seis di mainta en punto.
Road Runners Club Kòrsou i e spònser prinsipal di e kareda Girobank ta sumamente kontentu paso e aña aki Schottegatloop ta konta ku un kantidat rekòrt di inskripshon.
Un total di 700 deportista, fanátiko òf afisionado a inskribí pa e kareda rònt di Schottegat. Esaki ta un logro impreshonante.
Girobank huntu ku otro spònsernan Z-86, ASKA, Centrale Hypotheek Bank, Windward Insurance Solutions, Fruku i Fundashon Sedreko a regalá tur partisipante ku a inskribí un bunita kamiseta spesial pa e deporte di Atletismo.
E kamiseta aki ta di 100% polyester i ta esnan ku profeshonalnan di e deporte aki ta usa.
Por registrá for di 5or di mainta.
E parti di 12 kilometer pa e kanadónan ta sali for di Schouwburgweg pa mitar di shete mainta i registrashon ta for di 6’or di mainta.
Final di e kareda di Schottegat pa tur dos distansia ta na stadion Johnny Vrutaal na Rif.
Komo ku 30 aña ta un logro hopi grandi e aña aki tur partisipante ta risibí tambe un sertifikado di partisipashon.
E sertifikado aki tin nan tempu ofisial riba dje i lo ser mandá na kas ku servisio postal.
Tur dato di e partisipante mester ta kompleto i korekto asina por manda e sertifikado di partisipashon ofisial aki direktamente na kas.
Na stadion di Rif lo tin algu pa refreská i tambe tur partisipante por bin bei ke e tremendo sòpi di Road Runners Club Kòrsou.
Girobank i Road Runners Club Kòrsou i tur e otro spònsernan ASKA, Centrale Hypotheek Bank, Windward Insurance Solutions, Fruku i Fundashon Sedreko ta invitá atletanan pa partisipá na e di 30 edishon di Kareda di Schottegat i na tur hende amante di e deporte di Atletismo pa bin apoyá e partisipantenan durante di e ruta ku ta kubri Schottegatweg kompleto.