WILLEMSTAD – E pago di debenan atrasá di Antia i di e teritorionan insular lo monta na un suma di 559.4 mion. Di tur a partnernan, St. Maarten ta responsabel pa e gran parti di e debe retrasá aki ku kasi 183.2 mion ku ta bon pa 34% di e debe total.
E parti di Gobièrnu Sentral a keda kalkulá na 151.4 mion, Kòrsou 148.9 mion, Boneiru, 55.3 mion, St. Eustatius 15.1 mion i Saba na 5.5 mion.
E pago di debenan atrasá den realidat lo ta muchu mas haltu, ya ku e sifranan aki ta basa riba kalkulashonnan hasí te ku 31 di desèmber 2005. E debenan atrasá aki pa gran mayoria ta pa Fondo di Penshun General APNA.
Gobièrnu Sentral tambe debe SVB, pero e debenan atrasá aki no a wòrdu inkorporá den e kalkulashon di e debe total. E punto di salida di Gobièrnu ulandes ta ku SVB, BAB, UNA tur ta pertenesé na e sektor di kual si Gobièrnu Antiano tin debe na nan, ta debe di gobièrnu na su mes.
Minister di Finansa ya a indiká, ku Gobièrnu Sentral debe SVB 337 mion. Sinembargo, si Gobièrnu Sentral dividí e debe entre tur e islanan, Gobièrnu di Ulanda lo paga pa esaki, ya ku esaki lo ta un debe atrasá di e teritorionan insular na SVB.
Relashoná ku e kanselashon di debe, Ulanda a primintí di kumpli ku tur e debenan ku no a kumpli kuné. E akuerdo aki ta, ku 31 di desèmber 2005, lo ta e último fecha. Tur debe atrasá ku keda akumulá despues di e fecha aki, lo no wòrdu pagá pa Ulanda. Ta pa e motibu aki a kalkulá e debe te na un máksimo di 560 mion.
Ulanda lo paga e kuenta aki asina ku e Komishon di Supervishon Finansiero keda establesé na Kòrsou i St. Maarten. Esaki ta nifiká, ku e kreditornan por spera nan pago promé ku fin di e aña aki. Sinembargo, Ulanda a demandá pa un akountent independiente verifiká e pagonan ku lo tin ku wòrdu hasí promé ku kumpli ku esakinan.