WILLEMSTAD – E falta di kama den Kuido Intensivo ta hasi ku no tin sufisiente aparato pa kuido di emergensia disponibel na St. Elisabeth Hospital. Ayera un biaha mas tabata un di e dianan sumamente drùk pa e departamentu di promé asistensia (Poli) di SEHOS. Un kantidat di pashènt mester a keda atendé, te ku no tabatin espasio pa akomodá e pashèntnan ku tabata yega na Poli pa tratamentu di emergensia. Inkluso tabatin kasonan ku mester a keda trasladá pa Kuido Intensivo, pero ku pa motibu ku no tabatin kama i aparatonan nesesario, mester a laga tur e pashèntnan aki drumi den un sala pegá ku Poli pa por vigilá nan situashon.
For di siman pasá un biaha mas tabata den notisia e falta di kama riba departamentu di Kuido Intensivo i den mesun rosea tambe e falta di empleadonan kapasitá a bin den notisia. Direktor den un entrevista previo den medionan di komunikashon a konfirmá e situashon ku a surgi un biaha mas ku no tin espasio den Kuido Intensivo i ku mester sigui manda pashèntnan pa eksterior. Pa SEHOS por konosé ekspanshon di e departamentu aki, mester bai tin mas empleadonan kapasitá pa e departamentu, komokiera ku e ta eksigí pa tin personanan ku un preparashon di un grado mas haltu den enfermeria.
Ayera e situashon di vários kaso ku a presentá, den kua tabatin kasonan di emergensia ku mester tabatin kuido intensivo, no por a pasa e pashènt pa e departamentu aki. Awor mas ku nunka mester kaba di konkluí e proyekto pa un hospital nobo ku tin un kuido intensivo ku mas espasio.
Awe mainta LA PRENSA a papia ku direktor di e instituto, dr. Douglas Pinedo ku a bisa ku e situashon ta “ferfelu”. E gerente médiko a bisa, ku tabatin dos luna basta trankil, pero awor aki tin dos fin di siman tras di otro, ku e situashon ta unu di masha atenshon. Te awor aki, segun dr. Pinedo a bisa, tur pashènt a haña e kuido adekuá. Den e kaso aki ta usando e kombinashon di wak ken por atendé aki i kasonan ku lo haña atenshon otro kaminda, por ehèmpel na Colombia.
Aktualmente e Departamentu di Kuido Intensivo tin 7 kama so i den kasonan ekstremo por yega na 8 kama si haña hende pa duna e kuido, loke ta un problema serio. “Mester tene kuenta ku ta trata di kuido spesialisá i por lo tantu e personal tambe ta spesialisá”, asina el a bisa. Ademas e problema no ta djaki so, pero na diferente parti di mundu, inkluyendo Ulanda, tin un eskases di personal spesialisá. Un delegashon di SEHOS ta na Ulanda pa reklutashon di personal i ya kaba nan a entregá algun nòmber.
Un di e puntonan ku ta pensando riba dje ta, pa krea un sentro kaminda un pashènt ku tin problema ku halamentu di rosea lo keda den un departamentu spesial, loke lo aliviá e situashon general. Pa yega na un evaluashon di e posibilidat a buska un eksperto di Ulanda ku lo yega Kòrsou un di e dianan aki. A base di su konseho lo wak kiko lo bai hasi, segun dr. Pinedo a bisa.
Miéntras tantu, awe mainta a drenta informashon, ku un di e personanan ku ayera a yega Poli ku un derame serebral a bai sosegá. Ta trata di un funshonario di un instituto finansiero lokal. Na momentu ku nos a papia ku dr. Pinedo, e no tabata na altura di e kaso aki, pero el a sigurá, ku tur hende ku yega SEHOS ta haña e kuido médiko adekuá. “Riba esei no mester tin duda”, asina dr. Pinedo a bisa.