Lorito ta yama tur hende un felis djasabra. Hopi hende a drumi trankil i dushi sabiendo ku nan tim (Ulanda) a klasifiká ayera. Bon ambiente tur kaminda i tur hende a komportá. Ulanda awor aki klaramente ta un di e faboritonan pa gana. Tabatin aglomerashon di hende na diferente sitio kaminda e forma ambiente, anto riba un djabièrnè atardi.
*********
Lorito mes a kapta algun eksperto ku a sinta wak wega huntu den The Trader serka Toni. Bo mes sa, semper e ambiente serka Toni ta maravioso, pasobra Toni mes ta bin sinta serka i e ta sòru pa tur kos kana bon. Riba un di e pòtrètnan bo ta mira Tony ta splika un hende tambe kon e strategia di wega ta. Tony no ta eksperto di organisashon di evento i catering so, pero e ta hopi di futbòl tambe.

Foto lorito 1 & 2
*********
Tambe nos a mira Doble P ku a kambia su nòmber den e dianan aki. Awor aki e yama baron Percy van Oranje Nassau, manera e mes a bisa. Tambe por mira baronnan Paul i Alexander huntu ku prens Gibi ku ta e úniko ku ta masha haltu den noblesa lokal. Un saludo i suerte den e próksimo fase di e torneo!
*********
Lorito a kunsumí den último dianan ku diferente aviso na papiamentu den diferente kampaña di informashon. Ku un tiki mas esfuerso por evitá erornan i usa bon papiamentu. Prinsipalmente ora ta ulandes ta traha aviso mester wak uso di idioma masha bon! Lorito ta kere ku un kampaña di informashon riba energia ta un bon kos! Pero huntu kuné nos mester hasi bon uso di nos idioma tambe. Ban traha duru pa esei! E esfuerso aki no ta kosta masha!
*********
Nos ta serando siman ku preokupashon pa loke ta pasando na UNA. Mester hasi algu na e situashon, pasobra ta parse ku e relashonnan inter humano ta laga masha di deseá. Un di e dianan aki e kos t’ei eksplotá.
*********
Mañan ta Dia di Tata. Un hende a bisa nos ku mañan ta Dia di tur Papi (Dòis). Kon ku nos bòltu, kon nos bir’é, ta parse ku tatanan no ta hañando e mesun atenshon ku por ehèmpel mama. Lorito tin tendensia di pensa, ku ta pa nan mes falta. Si tatanan demostrá mas responsabilidat, nan lo haña mas atenshon! Di tur manera Lorito kier a deseá tur tata un felis dia i usa e dia aki, no pa selebrá so, pero pa analisá e ròl di tata den nos sosiedat. E responsabilidat di tata ta un kos ku mester bai traha riba dje.
*********
Nos ta bai keda te aki awe. Djaluna nos lo t’ei ku tur informashon ku bo no ta haña otro kaminda. Si bo tin alanan zona, wak ariba. Ku tur probabilidat ta Lorito. Te djaluna awor ku Dios su poder.