WILLEMSTAD - E kompania Insel Air ta determiná pa logra un trato hustu pa e kompania si outoridatnan duna kualke insentivo na e kompania merikano American Airlines.
Miembro di Gerensia di Insel Air, Edward Heerenveen, tabata masha kategóriko den e asuntu aki: “Si yuda American Airlines, nos tambe mester haña yudansa”, asina Heerenveen a bisa.
American Airlines a anunsiá ku e lo bai skrap un di su dos buelonan diario pa Kòrsou entrante promé di sèptèmber awor. Den algun seno ta hungando ku e idea pa pidi e kompania keda i hasta eventualmente para garantia pa sierto kantidat di stul òf por ta hasta supsidiá kada buelo. Ta konsiderando e punto aki pa motibu ku e desishon di American Airlines ta nifiká ku lo pèrdè mas ku 5 mil kupo pa luna for di Merka pa Kòrsou.
Den promé instante tabata parse ku por a garantisá e di dos buelo pa dia ku sierto insentivo. LA PRENSA a komprondé ku a menshoná e posibilidat pa garantisá un sierto kantidat di stul riba kada buelo i despues hasta un supsidio pa buelo. E peliger di garantia pa stul i/òf supsidio ta sintá den e hechu ku un kompania no ta hasi masha e ora ei pa merkadea un ruta asina aki komo ku ya kaba e tin su entrada garantisá.
E informashon ku eventualmente lo por duna insentivonan na American Airlines a yega orea di Insel Air tambe. Heerenveen a bisa ku e kompania lokal lo no aseptá esei di ningun manera. “Nos tambe ta sufriendo di e mesun impakto anke nos ta usando hopi kreatividat awor aki. Si duna AA, nos tambe mester haña. Komo kompania di Kòrsou nos ta eksigí e mesun trato”, asina Heerenveen a bisa.