Dia di Tata ta kombiná ku Dia di Salú di Mucha

WILLEMSTAD -- Pa kasualidat e aña aki Dia di Tata ta kai riba e mesun dia ku Dia di Salú di Mucha. Esei ta pone ku Gobièrnu di Kòrsou a kombiná e dos aspektonan aki huntu pa mustra riba ròl di tata den edukashon di yu(nan).
Gobièrnu di Kòrsou ta bisa ku den kuadro di maneho di Salubridat, Diputado Humphrey Davelaar, enkargá ku Salubridat Públiko, ta enfoká riba Prevenshon Integral. P’esei e Dia di Salú Di Mucha, proklamá riba 15 yüni na aña 1994 dor di Gezaghebber di Teritorio Insular di Kòrsou”, riba petishon di Departamentu Salú Hubenil, ta di sumo importansia pa traha riba salú di nos muchanan.
E meta di Departamentu Salú Hubenil (DSH) di Servisio di Salubridat Públiko di Kòrsou ta vigilá i promové salú, kresementu i desaroyo di mucha i hóbennan entre 0 – 19 aña di edat. P’esei DSH ta organisá tur aña durante e temporada aki, aktividat pa duna informashon na públiko en general tokante diferente tópiko di salú i komportashon salú. E tin programanan di prevenshon i instrumentonan spesífiko pa detektá problema di salú, kresementu i desaroyo.
Dia di Tata e aña aki a kai riba dia 15 di yüni 2008, “Dia di Salú di Mucha”. Motibu pa kua Gobièrnu i Departamentu di Salú Hubenil (DSH) ta para ketu riba e importansia di e ròl di tata den edukashon di su yu(nan). Hopi bia nos tin e tendensia di pensa ku edukashon di yu ta tarea prinsipalmente di hende muhé, e.o. mama, wela òf tanta. Pero e envolvimentu di un tata den edukashon di su yu(nan) ta masha importante pa desaroyo i salú di un mucha. Diputado Davelaar ke suprayá den kuadro di fortifikashon di famia pa pone atenshon riba tatanan.
Ora un tata ta envolví den edukashon di su yu i ta pasa tempu ku su yu e ta krea un laso fuerte ku e yu. Atenshon i kariño di un tata ta hisa e balor propio serka un mucha. Un mucha ku un balor propio haltu ta un persona kontentu ku ta gusta koperá ku otro. E ta un mucha eksitoso na skol pasobra e ta gusta siña. Tambe dor di su aktitut positivo otronan ta balorá su amistat. Tambe e por dil mihó ku strès i tin ménos chèns pa desaroyá problema ku komportashon. Un laso fuerte i konfiansa entre tata i yu fo’i chikí tambe ta un base pa un bon relashon i komunikashon entre nan dos durante e añanan di adolesensia. Esaki ta importante komo ku durante adolesensia e yu ta forma su propio identidat. I un bon guia di su tata tin hopi balor den e proseso aki.
Mirando e importansia grandi ku mayornan en general i tatanan spesífiko tin den edukashon di nan yu, DSH ya pa un tempu kaba ta implementando un programa pa sosten di mayor den edukashon. E programa aki ta e asina yamá Tripel P (Programa Pedagógiko Positivo). Vários profeshonal di DSH i di otro organisashonnan ku ta traha ku mayor i mucha a risibí training pa nan por duna sosten i guia na mayornan den edukashon di nan yu(nan). Tur 35 profeshonal a risibí un training. Djabièrnè dia 13 di yüni 2008 a hasi entrega di e sertifikadonan pa partisipashon na e training di Tripel P.
DSH ke hasi uso di e oportunidat aki pa felisitá e profeshonalnan ku ta risibí nan sertifikado Tripel P. Tambe ta deseá tur tata di Kòrsou riba “Dia di Tata” un dia dushi den seno di famia.