No tin awa pa laba. E loke tur hende ku un tiki noshon di gobernashon por a spera, a bira realidat. A aplasá e fecha riba kua e kambionan estatal pa Kòrsou i St. Maarten mester drenta na vigor i ku esei, e saneamentu di debe eksterno di Kòrsou tambe. Di un forma masha “Nanzi”, Ulanda a kore firma e akuerdo di SEI (Inisiativa Sosial Ekonómiko) ku gobièrnu di Antia, pa no laga señora Emily de Jongh-Elhage man bashí. No te a primintí pueblo ku e kambionan estatal lo nifiká “bienestar” pa pueblo. Echo ta keda si, ku e pipitanan di pinda ku señora de Jongh-Elhage a haña ku SEI ta ñaña kompará ku e 5 mil mion florin ku eksonerashon di e debe di Kòrsou lo a trese. Mi ta duda ku señora de Jongh-Elhage por logra muchu bienestar pa pueblo ku 180 mion florin.

Polítikonan, spesialmente esnan pro “slotverklaring”, tin masha hopi di bai splika pueblo. A pinta pueblo serunan di oro, riunan di honing i dicha eterno na momentu ku Kòrsou haña su Status Outónomo den Reino i Ulanda guli nos debe di míles di mion di florin. Niun hende tabatin e kordura di bai splika pueblo ku ta trata aki di un proseso kompliká, ku sigur no ta realisabel den 1-2-3. Djis chèk Aruba. Ku un pueblo pará manera 1 blòki tras di e ideal di separashon for di Kòrsou mes a dura mas ku 20 aña promé ku nan Status Aparte a bira un realidat.

Ku e proseso pa Kòrsou i St. Maarten haña un Status Outónomo den Reino ta 10 biaha mas kompliká ku e Status Aparte di Aruba, ta un echo. Mas ainda pa esnan responsabel pa kanalisá e proseso aki usa tur medio na nan alkanse pa splika, bolbe splika i sigui splika pueblo na plaka chikí kon e proseso ta hinká den otro i kiko ta e espektativanan. Nèt loke nan niun a hasi!

E proseso ku a kulminá siman pasá (i kere nos, e proseso aki a KULMINÁ!) ta drenta historia komo un di esnan mas mal manehá i malusá den historia polítiko di Antia Neerlandes. Mal manehá, pasobra nunka tabatin un intento serio di gobernantenan di PAR-PNP-FOL pa start un trayekto di suministro di informashon serio i komprendibel pa pueblo. Malusá, pasobra prinsipalmente PAR i su lider a malusá e supuesto “perspektivanan finansiero” di “slotakkoord” pa pinta pueblo un “tera primintí”, un “Utopia” ku nan mes tabata sa ku hamas lo realisá.

Pero, entre tantu nos tin ku saka e balanse tristu. A spat Antia for di otro, sakrifiká outonomia interno di Boneiru, Saba i St. Eustatius, suak esun di Kòrsou i St. Maarten i “total para que?” Riba dje a desperdisiá un tremendo dosis di “good will” di prinsipalmente pueblo di Kòrsou, ku un biaha mas a sali e Bombokati.

Kiko t’ei sosodé awor? E status di BES-eilanden di Boneiru, Saba i St. Eustatius a práktikamente bira un realidat. Pues, téknikamente e tres islanan aki no ta forma parti di Antia mas. Òf si? Lo ta bon pa señora de Jongh-Elhage splika ami i míles di bobolongo mas kon e kos aki ta sinta presis den otro. Antia ta eksistí ainda? I si no, ta promé minister di kua pais e ta anto?

Te otro siman ku poder di Dios!

(Bo komentario, opservashon i hasta krítika ta importante p’ami. Skibimi na bobharms@setarnet.aw)