Mi kurason a dal un salto di legria, ora ku mi a lesa den korant ku Bestuurscollege di Kòrsou a disidí pa lanta un komishon ku lo karga e nòmber di e gran i inolvidabel outor i benefaktor, Boeli van Leeuwen. Mas legria a drenta mi alma ora mi ta tuma nota di e enkargo di e komishon ku a haña, esta pa determiná kriterionan ku mester sirbi komo base pa otorgá un premio “Boeli van Leeuwen” na personanan den komunidat ku hasi nan mes meritorio pa tal premio.

Mi tin un sugerensia. En bes di hasi e premio aki unu literario, por fabor hasié unu periodístiko. Mi ta kere ku Boeli van Leeuwen lo keda masha kontentu si e sa ku ta usa su nòmber i su espíritu literario pa premiá personanan ku destaká den mundu periodístiko.

Boeli lo ta kontentu si e sa ku lo premiá e periodista ku durante aña a destaká pa su ophetividat; pa su rèspèt pa e kódigo profeshonal di periodismo; pa su sentido di investigashon na nòmber di esnan ku no ta kapas pa hasi esaki nan mes; pa su defensa den prinsipionan demokrátiko; pa su estilo prosaiko di skibi i hopi importante, pa su uso respetuoso i leal di nos idioma PAPIAMENTU!

Boeli ta progenitor di un di mihó periodistanan ku Kòrsou a konosé, Anna van Leeuwen. Un periodista ku a destaká su mes pa su sentido investigativo i su afan pa, apesar di ta krítiko, semper pone ophetividat dilanti. Mi mes a konosé Boeli semper komo un persona ku a stimulámi pa ta kritiko den mi trabou komo periodista. “Puntra, puntra i sigui puntra, te ora ku “e bèrdat” di e asuntu sali na kla” tabata su mantra. “I ora “e bèrdat” ei revelá su mes, skibié ku ophetividat i hustisia”.

Atrobe, ku tur rèspèt. Si tin un gremio ku ta meresé un premio estímulo pa nan trabou, anto esei ta e gremio di periodistanan. Ta masha bon ku periodistanan, for di nan mes gremio, ta premiá nan miembronan ku destaká ehersiendo e profeshon noble aki. Pero esei no ta sufisiente.

Un periodista ku ta tuma su trabou na serio i ku ta traha usando e kódigo di kondukta profeshonal komo su “strea di nort”, ta mas ku un simpel periodista. E ta kronista di historia ora ku historia ta haña forma. E ta esun ku ta kuestioná na nòmber di esnan ku no tin e bos òf e kurashi pa kuestioná. E ta krítika na nòmber di esun ku no por kritiká òf tin miedu di hasi esaki. E ta defensor di esnan sin bos, esnan tené atras. Ku poko palabra, un berdadero defensor di demokrasia i e libertatnan ku esaki ta trese kuné.

Ta p’esei, ku tur rèspèt miembronan di komishon Boeli van Leeuwen, konsiderá duna e prestigioso premio aki na esnan ku sin lugá pa duda, dia aden, dia afó ta hasi i lo sigui hasi loke Boeli a hasi: usa frasenan komo pinsel pa pinta e kuadro di bida di e yu di Kòrsou djawe, mañan i semper.

Te otro siman ku poder di Dios

(Bo opinion, krítika òf opservashon ta importante p’ami: skibimi na: bobharms@setarnet.aw)