PHILIPSBURG / WILLEMSTAD – Diputado Maria Buncamper-Molanus a retirá ayera komo diputado (i no komo miembro di Konseho Insular di Sint Maarten) nèt promé ku e aseptá un moshon di deskonfiansa kontra dje. Sinku di e 11 miembronan di Konseho Insular mas despues a aseptá e moshon di deskonfiansa, 4 miembro a vota kontra. Sra. Buncamper-Molanus no por a vota durante e moshon komo ku reglanan ta bisa ku bo mes no por vota riba algu ku tin di aber ku bo mes. E miembro di DP-Sint Maarten Theo Heyliger no tabata presente na e reunion loke a laga su frakshon masha debilitá.
E korant The Daily Herald ta bisa den su edishon di awe ku e retiro di sra. Buncamper-Molanus tabata parse mas bien un zèt polítiko stratégiko ku un intenshon real pa bandoná e puesto. Ku e desishon pa retirá a trata di evitá ku ta pasa e moshon di deskonfiansa pero finalmente tòg a vota pa e moshon.
Lider di DP-Sint Maarten, Sarah Wescot-Williams, a bisa despues di e reunion ku e lo pidi e diputado rekonsiderá su desishon. Segun e lider polítiko, ya kaba kasá di e diputado Claudius Buncamper a renunsiá for di su posishon kontroversial na e kompania TELEM, miéntras ku e diputado tambe a renunsiá. Ku esei a surgi un situashon nobo, asina sra. Wescot-Williams a bisa. Mas aleu sra. Wescot-Williams a bisa ku e moshon tabata unu di oposishon. “E no ta nada úniko i ta pasa tur ora. Ademas e moshon a pasa komo ku National Alliance (di oposishon) tabatin mas miembro presente. Pero oposishon mester ta presente tambe ora bin ku un proposishon pa baha sra. Molanus komo miembro di Konseho Insular”, asina sra. Wescot-Williams a splika.
Sra. Buncamper mes a bisa ku e ta dispuesto pa keda na e posishon si pidié rekonsiderá. “Lo mi sigui traha pa pueblo di Sint Maarten”, asina e polítiko ku a haña hopi sla den último dianan a bisa.
Kiko ta bai pasa den e kaso aki no ta masha kla. Gezaghebber di e isla Franklyn Richards a bisa ku lo keda un poko straño i lo konfundí pueblo si DP bolbe presentá sra. Buncamper-Molanus komo diputado.
E problemanan polítiko pa sra. Buncamper-Molanus a kuminsá despues ku a resultá ku e Fundashon Sky is the Limit a haña un kontribushon di 25 mil dollar pa un aktividat polítiko di sra. Buncamper-Molanus. A lanta e fundashon pa sostené aktividatnan polítiko di sra. Buncamper-Molanus, ku tabata presidente di e fundashon, den kampaña. A rekonosé miéntras tantu ku e hechu ku e kasá tabata den e hunta direktiva di TELEM i TELEM a kontribuí ku 25 mil dollar a krea e persepshon di konflikto di interes. E lider di oposishon William Marlin (National Alliance) a bisa ku mester evitá tambe kualke “persepshon di konflikto di interes”. “Esei tambe ta un kos masha serio”, asina el a bisa.
E retiro di e diputado ta bin na momentu ku Sint Maarten a para duru últimamente kontra e prinsipionan di “good governance” ku prinsipalmente Ulanda a bin ta pusha pa nan den e kambionan estatal ku ta na kaminda. Ulanda ke evitá entre otro nepotismo i nombramentunan polítiko deskabeyá.