WILLEMSTAD – Polis ta konfirmá detenshon di tres sospechoso di asesinatonan ku a tuma lugá resientemente. Ta trata di e kasonan ku a tuma lugá na Kaminda Amatista na Kurá Pieda i den Bloksteeg na Punda. Den e kasonan akí Ronarvey Franca i Nick Daryanani a muri.
E kaso di Franca a tuma lugá dia 3 di aprel último. Riba e dia ei deskonosínan a lòs diferente tiru ku arma di kandela riba e víktima Franca. Franca a yega ku su outo na un kas den Kaminda Amatista i ora el a baha e tirunan a alkans’é. Tabatin hopi spekulashon enkuanto un sospechoso di inisial M.B. ku lo a tira Franca.
Sinembargo polis a detené ayera un otro hòmber di 26 aña di edat di inisial R.C. E detenshon a tuma lugá den kareda di 12.10 na Pietermaai.
E otro detenshon a tuma lugá ayera mainta 5’or na Muizenberg. Einan polis a enkontrá e hòmber di inisial M.P. di 37 aña. Den kareda di 11.20 a detené un otro hòmber di inisial H.E. di 45 aña di edat. E detenshon akí a tuma lugá na warda di polis na Otrobanda. Tur dos e sospechosonan a nase na Kòrsou i ta sospechá nan di ta envolví den e kaso di asesinato di e komersiante Daryanani dia 25 di mei último. Polis ta informá ku a detené nan tambe en konekshon ku enkubrimentu.
Den un di tres kaso polis ta informá ku riba petishon di polis hulandes, a detené e hòmber di inisial R.A. di 40 aña di edat i nasé na Kòrsou. Ta sospechá R.A. di a kometé diferente atrako na Hulanda i tambe ku e tabata envolví den bendementu di droga. Polis a detené R.A. ayera mainta 5’or na un kas den Goede Hoop. Durante e akshon polis a detené tambe un hòmber di inisial R.G. di 36 aña di edat. E tabatin un kantidat di richi yená ku koka den su poder.