Etiketa ta bai ku tempu?
Kisas lo tin algun hende ku no tin kunes ku bon manera. Pero ta di spera ku mayoria hende ke pa nan mes ta bon den kontakto i komunikashon ku otro hende. I ta esaki ta hasi ku etiketa i reglanan di protokòl ta keda nesesario.
Etiketa ta reglanan sosial skibí òf nò, ku ta pone ku komunikashon i kontakto entre hende ta bai bon i dushi i ku no tin, ni ta okashoná, problema sin nodi. Bon manera ta algu ku ta keda komprondé na un otro manera den kada pais, kultura i gremio sosial. I kambionan den mundu ta pone ku kada tempu tin otro etiketa i protokòl. Etiketa ta bai ku tempu, pero ku hende bou di sirkunstansia normal, tin nesesidat kontinuo pa sinti su mes bon i dushi ku otro, ta algu ku nunka lo kambia.

Sabiendo esaki nos ta ban wak rondó di nos na Kòrsou den e tempu aki. Kaminda sa parse muchu biaha ku hopi hende; di tur gremio sosial, di tur edat, di tur nivel di enseñansa, no sa, no ta komprondé ni ta interesá mashá den etiketa.

Kumindamentu
Yunan di Kòrsou ta konosí komo hende ku ta kumindá otro hende ora nan krusa ku otro i maske ku nan no konosé otro. Hopi hende ta parse di a pèrdè e kustumber aki. I ta kasi normal ku hopi hende no ta kumindá otro mas outomátikamente. Tin hende ta asta spanta ora un hende ku no konosé nan kumindá i ta kuminsá pensa kaba ku ta algu malu tin òf a pasa. Tristu ta ku hasta den dunamentu di servisio nos hendenan no ta mira pakiko mester kuminda e hende ku ta drenta komo kliente pa gasta su sèn.

Bistimentu
Un tempu tabata normal ku tin paña pa bisti na kas, pa bai skol kuné, pa bai misa i pa sali bai un evento di gala anochi. Awendia ta parse ku no tin diferensia mas unda bo bai, pasobra tur paña ta parse di ta bon pa tur okashon. Ta keda si ku sano wisio mester ta un guia pa bo sa kiko bo ta bisti ora bo ta bai sierto kaminda. P.e. paña muchu sunú i slòf ku flanè pa hende hòmber manga aden, sigur no por ta akseptabel nunka den nos kultura, den mayoria situashon, kaminda hende ke pa tum’é na serio.

E-mail i Internèt:
Teknologia moderno ta parse di ta duna hende mas oportunidat di ta invisibel i pa e motibu aki tin hende ta haña ku nan por komportá fe sla sin konsekuensia. Bon pa tira pieda skonde man.
Pero Internèt, dependiendo di kiko bo ke logra den bida, no ta kita nada for di bon komportashon. Fayo ta p.e. ora hende ta haña e-mail keda sin kontestá òf indiká ku a haña e mensahe; demostrando falta di konosementu i kisas edukashon. Òf ta manda email den tono negativo anónimo demostrando kobardia.
Loke tur usadó di Internèt mester kòrda sinembargo ta ku Internèt ta e medio di komunikashon ku ta ménos anónimo si abo no sa kon traha kuné.

Papiamentu
Lamentabel pa hopi hende ku ketu bai ta keda diferensianan sosial den tur komunidat, i tabatin un momentu ku hende tabata sa kon papia ku otro hende basá e.o. riba edat i posishon na trabou i den komunidat. Hopi hende no sa mas ki ora si i ki ora no por papia na sierto manera ku hende ku nan tin kontakto kuné. E manera ku bo papia den privá òf den públiko ta determiná tambe ki por ta resultado di e kontakto ku bo tin. Papia kon ku ta pasobra ta bo derechi demokrátiko por i ta resultá den reakshonnan ku hopi biaha, maske abo mes no ta nota, no ta kumbiníbu.

Na tinu tur hende sa ku bon komportashon i bon dominio di etiketa i protokòl, ta e mihó hèrmènt pa bo logra bo meta. Ke men ku ora un hende komportá kon ku ta, e ta duna indikashon ku e mes no ke pa su forma di komunikashon duna bon resultado p’e. Etiketa ta bai ku tempu wak pa abo tambe bai kuné.

Bon siman i chèk mi blòg na www.notabel.com.

Por komuniká ku Reyna Joe na info@notabel.com