WILLEMSTAD - Den e siman aki miembronan di Konseho Insular ku tabata ke por a haña tur informashon di miembronan di direktiva di BZV den un reunion di komishon permanente di Salubridat ku diputado Davelaar a yama. Ku esaki e diputado di PNP a demostrá ku e no tin nada di skonde, segun sekretario general di PNP, drs. Gimena van der Gen.
Otro prueba di transparensia total ta e echo ku diputado Davelaar den pasado, a pone tur dokumento tokante nombramentu di un konsultant na BZV ku tabata tópiko di kontroversia, na disposishon di tur miembro di Konseho Insular pa nan por tuma nota di esakinan na sekretariado di Konseho Insular.
Den e siman aki diputado a invitá direktiva di BZV pa splika na plaka chikí kon e proseso pa a skohe un konsultant a kana di un forma transparente i ku sosten di un mayoria den direktiva.
Tambe nan a splika dikon a alargá e kontrato ku e konsultant Latin Caribbean Consultants NV. Den nan splikashon nan a konfirmá e loke ku diputado Davelaar a bini ta splika riba e asuntu aki.
Segun Gimena van der Gen ta lástima ku diferente miembro di oposishon ku a hinka hinter e asuntu aki den un esfera di kontroversia polítiko no a asistí na e reunion i a bria pa nan ousensia. Nan no a bini e reunion pa nan por haña mas informashon tokante e problemanan den BZV ni e prosedura ku e direktiva a kana pa atendé ku e problemanan.
Loke sin duda a keda establesé durante e reunion ta ku diputado Davelaar tin solamente un voto den e direktiva i ku pa tuma kualke desishon e mester di un mayoria. Hecho ta ku apesar ku direktiva a duna diputado Davelaar mandato pa bini ku un kandidato pa direktor interino, tòg el a opta pa bini ku 4 diferente oferta ku direktiva a skohe for di dje basá riba un profil.
Otronan ta purba krea broyo argumentando ku ta faboresementu polítiko a tuma lugá na BZV pasobra e konsultant tabata eks-miembro di Konseho Insular pa PNP. Van der Gen ta puntra su mes: “Ta paso un hende a rekonosé un koló polítiko públikamente nunka mas e no por bin na remarke pa niun funshon? Kemen un hende mester wòrdu perhudiká pa restu di su bida paso el a rekonosé su koló polítiko públikamente?”
Al fin al kabo tur hende ora nan drenta e hòki pa vota na un elekshon tin un koló polítiko, segun Van der Gen, solamente di mayoria hende nan koló no ta konosí. E pregunta kardinal no mester ta ki koló polítiko un hende tin sino si e prosedura ku a kana pa yega na kualke eskoho tabata transparente i demokrátiko konforme e reglanan di bon gobernashon. Ta esaki mester ta e pregunta i no ki koló polítiko un hende tin.
Debí ku e diputado di PNP no tin nada di skonde, el a bolbe pone atrobe tur dokumento relevante di BZV ter inzage na disposishon di miembronan di Konseho Insular e biaha aki serka e sekretario di e direktiva di BZV. Basta nan tin interes i nan no ke krea broyo sin base, kada un mes por bai kontrolá pa nan mes si e proseso na BZV pa nombra i alargá kontrakt di e direktor interino a kana bon.