WILLEMSTAD - Parlamentario Glenn Liqui Lung ta preokupá pa e situashon di siguridat na empresanan grandi i vital na Kòrsou. Ta importante pa sa si tin un plan di kontingensha, dado kaso algu sosodé.
Liqui Lung a hasi e pregunta aki despues di e anunsio di Ministerio Públiko, ku a sera e investigashon dje aksidente grave i lamentabel ku a tuma lugá aña pasá den Curaçaose Dokmaatschappij riba e barku SEAMEC II i ku a kosta bida di 5 persona.
Ministerio Públiko a yega na e konklushon ku no por pone un hende responsabel pa loke a sosodé. E loke a sosodé ta un koinsidensia lamentabel di faktor ku a kondusí na e tragedia.
OM a anunsiá mesora ku no tin base mas pa sigui ku investigashon mas aleu.
Glenn Liqui Lung a bisa ku e loke a sosodé na e kompania, ta lanta pregunta serka dje.
E ta lanta pregunta riba e aspekto di siguridat den kompanianan grandi manera Dok. Pero tin mas kompania ku ta di importansia pa nos pais i ku por konsiderá komo kompanianan vital pa nos ekonomia.
Aki por pensa riba entre otro kompanianan manera UTS, Aqualectra i Refineria Isla.
Te kon leu tin un plan di kontingensha dado kaso algu mester sosodé? ta loke Liqui Lung ke sa.
Segun e parlamentario, na hopi pais na mundu tin e sistema kaminda kada tantu tempu ta tene un sorto di entrenamentu, kaminda tur esnan enbolbí ta partisipá. Un seshon di entrenamentu asin’aki ta importante pa nos sa te kon leu nos ta prepará pa kualke kalamidat, el a bisa.
Tin un punto mas di importansia: mester tene kuenta ku e hendenan ku ta traha den áreanan di riesgo haltu. Nos mester trata di tur manera pa minimalisá e posibilidat di un aksidente òf pió ainda, di un katástrofe, di akuerdo ku parlamentario Glenn Liqui Lung.